İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 301 Hüküm no: 329 Orijinal metin no: [143-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzin verilen tezgâhlar dışında yelken bezi dokunmaması Tersâne-i Âmire yelkencilerinin nizâmı Ma‘rûz, Tersâne-i âmire’ye verilen bâdbânların Nessâcbaşısı sâhib-i arzuhâl Yakub ve sâir bükücü olan zimmîler Samatya’da Yeni mahâllede iki bükücü kârhânesi ve Yedikule’de bir atik tersânede bir ki cem‘an dört bükücü kârhâneleri olup ve Tersâne-i âmire’de vâki‘ destgâhlardan mâ‘adâ âhar mahâllerde yelken bezi işlenmemek üzere fermân-ı âlîşân ile yelken bezi destgâhı memnû‘ iken bu esnâda ba‘zı kimesneler yelken bezi ipliği büküp sâir mahâllerde hilâf-ı fermân-ı âlîşân destgâh ihdâsına bâ‘is olmağla iplik bükücülük mezkûr olan dört kârhâne ve altı usta ve yirmi altı kalfaya tahsîs, onlar dahi bükeceği ipliği mezkûr kârhânelerde büküp âhar mahâlde muhdes destgâhlar ve iplik bükülmek men‘ olunması bâbında fermân-ı âlî sudûrunu istid‘â ederler. Lâkin husûs-ı mezkûr umûr-ı mîriyeden olmağla sa‘âdetlü defterdâr efendiye havâle buyrulmak bâbında emr ü fermân hazret-i men-lehü’l-emrindir. Fî 25 Ra sene [11]80.