İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 301 Hüküm no: 330 Orijinal metin no: [143-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı Mehmed Paşa-i Atik Camii Vakfı’nda depremde zarar gören Çifte Hamam kubbelerinin ahşap olarak tamir olunması Kumkapı kurbünde Nişâncıpaşa Hamâmı’nın keşfi Ma‘rûz, Kumkapı dâhilinde vâki‘ Nişâncı Mehmed Paşa-i atik Câmi‘i müstagallâtından olan Çifte Hamam’ın ricâl ve nisvân câmekân kubbeleri zelzeleden münşak ve mâil-i inhidâm olmağla hedm olunup mahâllerine ahşabdan sakf binâ olunmak istid‘âsıyla vakf-ı mezbûr mürtezikası ve mahâllesi ahâlîsinin arzuhâlleri bâlâsına sâdır olan fermân-ı âlîlerine imtisâlen taraf-ı dâ‘îlerinden keşif nâibimiz es-Seyyid Halil Efendi ve sa‘âdetlü Yeniçeri Ağası tarafından hamamlar husûsuna memûr Yazıcı Elli İki İbrahim Efendi kulları ve hâssa mi‘mârlarından Abdullah ve es-Seyyid Mustafa Halîfeler ve sâir ehl-i vukūf ile hamam-ı mezkûra varıp mu‘âyene ve misâha eylediklerinde gerek ricâl ve gerek nisvân hamamları câmekânlarının devren altmış ve katren dokuz ve kadden yirmi altı zirâ‘ irtifâ‘ı olan kebîr kubbeleri etrâf duvarlarıyla ma‘an dört tarafdan münşakka olup etrâf duvarlarına dahi vehn gelmekle ke’l-evvel kubbeler binâ olunduğu sûretde mütehammil olmayıp hedm ve müceddeden binaya muhtâc olup ve ahşabdan sakf binâ olunur ise etrâf duvarları istihkâmıyla husûl-pezîr olacağı mi‘mârân-ı mezbûrân ihbâr ve kârgîr olacağı sûretde on iki bin dört yüz on dokuz buçuk guruş ve ahşabdan olacağı sûretde iki bin altı yüz otuz guruş takvîm ve hamam-ı mezkûrun dahi beş hisse i‘tibârıyla bir hissesi hâlâ Mısır’da sâkin Mısırlı Hüseyin Ağa nâm kimesne üzerinde ve dört hissesi zü‘amâdan el-Hâc Mehmed nâm kimesnenin evlâd-ı sıgārı üzerlerinde olmağla gerek vakf-ı mezkûr mütevellîsi ve gerek sıgār-ı mezbûrûnun [144] vasîsi ve gerek merkūm Hüseyin Ağa’nın vekîli hamam-ı mezkûrun etrâf duvarlarını hedm ve müceddeden duvarlar üzerine kubbeler binâsına kudretimiz yokdur deyü ahşabdan sakfla binâ olunmasını istirhâmlarından mâ‘adâ mürtezika-i vakıf ve etrâf mahâllât ahâlîlerinden dahi İmam Süleyman Efendi ve Kayyûm Molla Süleyman ve Müezzin Molla Mustafa ve diğer Müezzin es-Seyyid Mehmed ve ferrâş es-Seyyid Ahmed ve ahâlîden Osman Ağa ve el-Hâc Mehmed ve el-Hâc Hasan ve Mustafa Beşe ve İbrahim ve Hasan Bey ve es-Seyyid Mustafa ve Ali Beşe ve Süleyman ve Hüseyin Beşe ve diğer Ali Beşe ve Boşnak Süleyman ve Hüseyin ve diğer Hüseyin ve el-Hâc Ali ve Abdullah Çelebi ve Ömer Ağa ve Mehmed Ağa ve Ahmed Ağa ve el-Hâc Ahmed ve Hüseyin Beşe ve İsmail Ağa ve Mustafa Ağa ve Molla Bekir ve es-Seyyid Hasan ve Musa Ağa ve Abdülkadir ve diğer Mehmed Ağa nâm otuz üç nefer kimesneler ile etrâf mahâllât imamları ve mazbûtü’l-esâmi ahâlîleri vakf-ı mezkûrun îrâdı hamam-ı mezkûra münhasır olup ve etrâfında âhar hamam olmadığından pîr ve alîl olanlar hamam-ı mezkûra muhtâc olmağla onlar dahi kezâlik ahşabdan sakf binâ olunmasını istid‘â eyledikleri ba‘de’l-inhâ keşf-i mezkûr üzere mi‘mâr ağa kulları mührüyle tahrîr olunan takvîm defterleri huzûr-ı âlîlerine irsâl olunduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 24 Rebî‘ülevvel sene 1180.