İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 304 Hüküm no: 335 Orijinal metin no: [145-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Efendizadelerin Şehremini’ne bulunan fırın ve değirmenin kira değerinin tayin olunması Şehremini kurbünde Has Fırın bey‘ için Ma‘rûz, Sâdır olan fermân-ı âlîye imtisâlen işbu arzuhâlin sâhibleri Derviş Efendizâdelerin Şehremini’nde vâki‘ vakıf fırın ve değirmenin sülüsân hissesinin el-yevm değer bahası takvîm ve müşterî tedâriki için nizâm ustaları dâ‘îhâneye ihzâr ve istintâk olundukda mârrü’z-zikr fırın ve değirmenin el-yevm otuz beş guruş kirâsı olmağla beşer guruş icâre-i vakfa mahsûb olup bâkī otuz guruş kalıp ve yevmî yüz yirmişer akçe îrâd hâsıl olup ol etrâfda olan değirmen ve fırınların her akçesi otuzar ve otuz beşer guruşa alınır ve satılır, lâkin şimdi harâb olup bi’l-külliye tecdîde muhtâc olmağla her akçesi yirmi guruşdan ziyâdeye tahammülü olmayıp hesâb-ı mezkûr üzere sülüsân hissenin bin altı yüz guruş el-yevm değer bahasıdır ve ziyâdeye tahammülü yokdur ve bu mikdâra müşterî tedâriki kābildir deyü muvâcehesinde takvîm eylediklerinde sâhibey-i arzuhâl Mehmed Said iki bin guruşdan noksâna vermeğe rızâ dâde olmadığı huzûr-ı âlîlerine i‘lâm olundu. Fî 28 Rebî‘ülevvel sene 1180.