İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 304 Hüküm no: 336 Orijinal metin no: [145-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat Eden Kemal’in kızları Barona, Estero ve Solo’nun, Mosi aleyhindeki alacak iddialarının reddedilmesi Fenerkapısı’nda mahzen Ma‘rûz, Fenerkapısı dâhilinde Abdi Subaşı mahâllesinde mütemekkin iken on sene mukaddem hâlik olan Kemâl v. İsak nâm Yahûdînin sulbiye kebîre kızlarından arzuhâl eden şahısları mu‘arrefe Barona ve Estero ve diğer kızı Sol nâm Yahûdîye tarafından vekîli anası Kalo meclis-i şer‘-i hatîrde derûn-ı arzuhâlde merkūmü’l-ism Abram Yahûdînin oğlu Mosi’den mahâlle-i mezbûrede vâki‘ Sinan Paşa Vakfı’ndan işbu merkūm Mosi’nin tasarrufunda olan iki tabaka ma‘lûmü’l-hudûd menzilin tahtında olan mahzenin nısf-ı şâyi‘i merkūm Mosi’nin ve nısf-ı şâyi‘i dahi babamız merkūm Kemâl’in tasarrufunda iken hâlik oldukda bize intikāl etmiş iken merkūm Mosi mahzen-i merkūmu ve üzerinde olan menzilini yine vakf-ı merkūmdan ittisâlinde vâki‘ kezâlik babamız merkūmdan müstakil bir bâb menzilimizi altı bin iki yüz elli guruş bedel mukābelesinde bizim rızâmız yoğiken fuzûlî âhara ferâğ ve altı bin iki yüz elli guruşu kabz ve istihlâk etmekle bedel-i mecmû‘-ı mezkûrdan kendi menzili ve tahtında olan nısf mahzenin kıymetine isâbet eden meblağ ba‘de’l-ifrâz bâkīsi bizim nısf mahzenimiz ile menzilimiz için bize alıverilmek matlûbumuzdur deyü eyledikleri bedel da‘vâları şer‘an mesmû‘a olmadığından mâ‘adâ merkūm Mosi’nin yedinde olup ibrâz eylediği temessük ve vakıf defteri derkenârı mantûkunca mahzen-i merkūmun üzerinde olan menzil ve mahzen müstakillen merkūm Mosi’nin babası merkūm Avram üzerinde olup ve ittisâlinde olan menzil dahi merkūm Kemâl’in helâkinden sonra zevcesi merkūme Kalo bâ-ma‘rifet-i mütevellî üzerine [binâ] etdirip ba‘dehû dört yüz guruş bedel-i makbûz mukābelesinde merkūm Mosi’nin anası Biya bt. Salamon nâm Yahûdîyeye [146] ferâğ ve ol dahi Abdullah Efendi nâm kimesneye ferâğ ve tefvîz etmekle müdde‘iyât-ı mezbûrât Barona ve Estero ve Kalo bedel-i merkūm da‘vâsı için mu‘ârazadan men‘ olundukları mübâşirleri İbrahim Çavuş kulları iltimâsıyla huzûr-ı âlîlerine i‘lâm olundu. Fî 26 Rebî‘ülevvel sene 1180.