İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 321 Hüküm no: 359 Orijinal metin no: [154-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat kayıkçıları ile Hasköy tarafı kayıkçılarının iskele hususunda anlaşma sağlamaları Balat kayıkçılarıyla Hasköy kayıkçıları nizâ‘ı Ma‘rûz, Arzuhâl eden Balat iskemlesi kayıkçılarının Hasköy kayıkçılarıyla olan iskele nizâ‘ları için Çarşamba günü Arz Odası’nda huzûr-ı âlîlerinde terâfu‘larında Hasköy kayıkçılarının yedlerinde olup bin yüz on dokuz senesi târîhinde hüccetde Balat iskelesinde Eyüb tarafında vâki‘ İhtiyâr İskelesi demekle meşhûr sagīr iskelede Balat kayıkçılarıyla Hasköy kayıkçıları ihtiyârları ma‘an işledikleri tahrîr olunup ve bir gayrı senedleri olmayıp ve zikr olunan iskelelere tarafeynin [155] istishâb ve istiklâli fermân-ı âlîşân ile tahsîse mevkūf olmağla öteden beri bilâ-nizâ‘ olageldiği vechile mahâll-i mezkûrda ahadühümâ âharın kâr ü kisbine mümâna‘at etmemek iktizâ etmekle ol vechile tarafeyne nizâm vermek için izzetlü yeniçeri Ağası kullarına havâle buyrulmağla ağa-yı mûmâ-ileyh dahi Balat İskelesi’nde Eyüb tarafında vâki‘ zikr olunan sagīr iskele ile keresteciler beyninde olan iskelesi kerestecilerin ma‘ûna ve sâir maslahatları itmâmında hâlî vakitde Hasköy kayıkçıları işleyip sâir dükkânlar önünde Buğday İskelesi ve Fener tarafında olan büyük iskelelerde Balat kayıkçıları işlemek üzere beynlerini bulmağla Balat kayıkçılarından kethüdâları Hasan ve Ali ve Abdurrahman ve es-Seyyid Feyzullah ve el-Hâc Hüseyin ve Küçük Hüseyin [ve] diğer Hüseyin ve Mehmed ve di[ğer] Mehmed ve âhar Mehmed ve diğer Hüseyin ve Hasköy kayıkçılarından kethüdâları es-Seyyid İbrahim ve Mustafa ve İbrahim ve Bostancı Ahmed [ve] Ocak yazıcılarından Mustafa kulları ve Bostancıbaşı ağa kulları tarafından İbrahim Haseki ma‘rifetleriyle dâ‘îhâneye gelip minvâl-i meşrûh üzere râzılar olduklarını ikrâr u i‘tirâf ve fî-mâ-ba‘d kat‘-ı nizâ‘ eyleyip birbirlerinin kâr ü kisblerine mümâna‘at etmemek üzere ittifâk eylemeleriyle keresteciler dahi vech-i meşrûh üzere Hasköy kayıkçılarına mümâna‘at etmemek bâbında emr ü fermân hazret-i men-lehü’l-emrindir. Fî 9 Rebî‘ülâhir sene 1180.