İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 320 Hüküm no: 358 Orijinal metin no: [154-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Mardıros ve kardeşi Avanis’in sahibi oldukları meyhane üzerine inşa etmiş oldukları taraça ve bacanın yıktırılması Keşif, Kumkapı kurbünde Çadırcı Ahmed Çelebi mahâllesinde menzil Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz es-Seyyid Halil Efendi hâssa mi‘mârlarından es-Seyyid İsmail ve diğer İsmail Halîfeler ve sâir ümenâ-yı şer‘le mahmiye-i İslambol’da Kumkapı dâhilinde Çadırcı Ahmed mahâllesinde vâki‘ İmamı Mehmed Çelebi Vakfı’ndan arzuhâl eden Abraham v. İsayi ve Bağdisar v. Kirkor’un tasarrufunda olan menzillerine varıp akdeylediği meclis-i şer‘-i kavîmde vakf-ı mezbûr mütevellîsi el-Hâc Salih tarafından vekîl-i müsecceli Câbî-i Vakıf Süleyman Ağa hâzır olduğu hâlde mesfûrân Abraham ve Bağdisar zikr olunan menzilleri ittisâlinde yine vakf-ı mezbûrdan bir bâb meyhâne mutasarrıflarından kendi tarafından asıl ve şerîkleri Arakil ve Avanis veledey Mardıros taraflarından vekîl olan Mıgırdıç v. Sokyas muvâcehesinde işbu zikr olunan meyhânenin sakfı üzerine mesfûrûnun bu esnâda binâ ve ihdâs eylediği mi‘mârân-ı mezbûrân misâhaları ile arzen iki ve kadden bir buçuk ve tûlen iki zirâ‘ ve on sekiz parmak bacacı bacası ta‘bîr olunur kebîr baca ve yine tûlen ve arzen dörder zirâ‘ ve kadden iki buçuk zirâ‘ cihânnümâdan menzillerimizin makarr-ı nisvân olan mevâzi‘i görünüp havâle zarârı olmağla def‘ eylesin deyü iddi‘âsına binâen nazar olunup fi’l-vâki‘ havâle zarârı olduğu ve bu esnâda müceddeden ihdâsları mu‘âyene olundukda gerek bacacı bacası şeklinde ve gerek cihânnümâ misillü olan bacalardan her biri hilâf-ı emr-i âlî ve mugāyir-i nizâm ve bu bâbda sâdır olan evâmir-i aliyye mûcebince hedmi iktizâ eden ebniyedendir deyü mi‘mârân-ı merkūmânın haber verdiklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 5 Rebî‘ülâhir sene 1180.