İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 323 Hüküm no: 362 Orijinal metin no: [155-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi tablakârı olup Mahmudpaşa’da kahveci dükkânında sakin olan Debreli İshak’ın memleketine gönderilmesi Fi’l-asl Çörekçi olup vilâyetine gitmeğe ta‘ahhüd Ma‘rûz, Arzuhâl eden Çörekçi esnâfından kethüdâları Osman ve Yiğitbaşıları Mehmed ve Molla Süleyman ve el-Hâc Mehmed ve es-Seyyid İbrahim ve diğer es-Seyyid İbrahim ve Mehmed ve Mustafa ve Hüseyin ve el-Hâc Mustafa ve el-Hâc Mehmed ve diğer el-Hâc Mustafa ve Hüseyin ve Ali ve Mehmed ve Ömer ve diğer Ali ve Ahmed ve Süleyman ve Halil ve el-Hâc Musa ve es-Seyyid Abdullah ve es-Seyyid İsmail ve Feyzullah ve es-Seyyid İsmail nâm yirmi beş nefer kimesneler bundan akdem Şehzâdebaşı’nda Çörekçi tablakârı [156] olup hâlâ Mahmudpaşa kurbünde kahveci dükkânında sâkin ve derûn-ı arzuhâlde mezkûr Debreli İshak b. Abdurrahman nâm kimesneden kendi hâlinde olmayıp alâkası olmayan esnâfımız umûruna karışıp ihtilâl-i nizâmımıza bâ‘is olmağla içimizden ba‘zıları mezbûra tenbîh eyledikde bende bıçak yok mudur deyü ihâfe etmekle şer ve mazarrâtından emniyetimiz bi’l-külliye meslûb olmuşdur deyü sû-i hâlini muvâcehesinde ihbâr [ve] vilâyetine irsâl ile şer ve mazarrâtının irtifâ‘ını istid‘â eylediklerinde ol dahi birkaç güne dek vilâyetine azîmet eylediği iltimâslarıyla huzûr-ı âlîlerine i‘lâm olundu. Fî 9 Rebî‘ülâhir sene 1180.