İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 325 Hüküm no: 366 Orijinal metin no: [157-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuna sahillerinden satın alınacak arpa ve buğdayın fiyatının belirlenmesi Hınta ve şa‘îrin fiâtı sene-i sâbıkā üzere kat‘ emri Bâ-sah, İstanbul kādısı fazîletlü efendi Bu sene-i mübârekede Bahr-ı siyâh iskelelerinde ve Tuna sevâhilinde hınta ve şa‘îrin fiâtı sene-i sâbıkā misillü kat‘ ve zahîrenin dâneleri lillâhi’l-hamd sene-i sâbıkādan a‘lâ olduğuna binâen bu tarafda tüccâr ile habbâz tâifesi beyninde zahîrenin fiâtı kat‘ında müşâcere ve inâd ve muhâlefet ve tezâd iktizâ etmeyip geçen sene ne vechile nizâm verilmiş ise öylece kat‘ ve bey‘ ü şirâ eylemeleri iktizâ eder iken iki taraf mecbûl oldukları tama‘-ı hâma teba‘iyet ile imrâr-ı evkāt eylemeleri mahz-ı habâset ve ayn-ı mefsedet olup tarafeynden muharrik olanların ibreten li’l-gayr te’dîb ve gûş-mâlleri lâzım gelmiş iken bu def‘a enzâr ve tehdîd ile iktifâ olunmağla imdi iki tâifenin akıl ve rüşd sâhiblerini ihzâr ve mahâllinde zahîrenin fiâtı geçen sene misillü kat‘ olunduğuna binâen nân-ı azîzin bir dirhemi noksân olmak mutasavver olmadığın ve her kim bu maddeyi lisâna ve belki hâtırına getirir ise ibâdullaha hıyânet ve nâssa mazarrât töhmetiyle müttehim olduğunda iştibâh olmadığına binâen şer‘an hakkından gelinmek lâzım idüğünü kendülere gereği gibi tefhîm eyledikden sonra sene-i sâbıkāya tatbîk ile bir sâ‘at evvel fiâtı kat‘ ve vürûd eden zahîre-i cedîdeyi bey‘ ü şirâ etdirip zahîre nakli vakti fevt olmaksızın celb-i zehâir husûsuna ihtimâm ve dikkat ve fî-mâ-ba‘d hangi taraf hıyânet ve mel‘anete bî-vech tasaddî ederse muharriklerinin hakkından gelinmek için isim ve resimleriyle i‘lâma mübâderet ve hilâfını tecvîzden mübâ‘adet eyleyesin deyü. Fî 11 R sene [1]180.