İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 324 Hüküm no: 365 Orijinal metin no: [156-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbentçi esnafının, Uzunçarşı dülbentçi esnafından İstefan, Ağa Mali ve sairleri aleyhinde şikâyette bulunmaları Dülbendçi Nizâmı Ma‘rûz, Dülbendçi esnâfından kethüdâları el-Hâc İbrahim ve el-Hâc Mehmed ve el-Hâc Hüseyin ve diğer el-Hâc Mehmed ve Molla Ali ve Molla Hüseyin ve Mehmed Emin ve Molla Abdullah ve diğer Mehmed Emin ve el-Hâc Hasan ve Hüseyin Çelebi ve Süleyman ve Salih ve sâir bi’l-cümle ehl-i İslâm ustalarıyla zimmî ustalarından Tomas ve Avanis ve Ecinder ve Bedros ve Kokas ve Anapilyos ve sâirleri dâ‘îhâneye gelip esnâfımızdan Uzunçarşı’da İstefan ve Ağa Mali ve Sefer ve Mihrab ve Anuk ve Kalpakçılar’da Karabet ve Panos nâm yedi nefer zimmîler Âsitâne’ye gelen dülbendçi bazergânı iğfâl ile kapadıp ve müstakillen kendiler alıp cümlemize mahsûs olan [157] metâ‘ı habs ve bize marda ile verip husûsan bu sene gelen metâ‘da ehl-i İslâma bir değirmi dülbend vermemeleriyle ekserîmizin kâr ü kisbimize mâni‘ olurlar deyü teşekkî ve nizâ‘ etmeleriyle bu makūle esnâfın nizâm-ı kadîmlerine mugāyir hareket edenler men‘ ü def‘ olunmak ve umûr-ı ahz u i‘tâları ber-vech-i ta‘dîl tanzîm ile sâye-i hazret-i saltanat-penâhîde müreffehü’l-hâl olmalarıyla lisânen fermân buyrulmağla husûsları rü’yet ve bâ‘is-i teşekkî zacret olan mevâddın iktizâsına tasaddî olundukda Vâlide Hanı tüccârından Mirzade Abdülkadir Ağa ve Âmedî Sadullah Ağa ve Çelebi es-Seyyid Abdurrahman Ağa ve Muhsin Ağa ve Beyrûtî es-Seyyid Mehmed Ağa beynlerine tavassut edip mutlakā mesfûr yedi nefer zimmîye metâ‘ tahsîs olunmayıp gerek ehl-i İslâm ustası ve gerek sâir zimmî ustaları bazergâna kefil-i melî yâhud beynlerinde ma‘hûd hesâb üzere nakden bahasını verirken tüccârdan ba‘zıları biz sana vermeziz der ise âharları dahi ol metâ‘ı almağa ta‘ahhüd ve gelen metâ‘ iki yük ve üç yükden ziyâde olursa on hisse i‘tibârı üzere bir hissesi ehl-i İslâm beynlerinde ve dokuz hissesi ehl-i zimmet beynlerinde taksîm oluna ve Barhâne ta‘bîr olunur metâ‘ı pazarda ehl-i İslâm ustalarından dahi buluna ve bazergânlar dahi içlerinden bir kimesnenin bu vech üzere ta‘annüt etmeyeceğine tekeffül etmeleri ba‘de’t-tescîl dülbendçilerin fürûht etdikleri mücessem ve moher yemenîler ve boyalı dülbend ve yaşmaklık dülbendlerin fîsi husûsan müzâkere olundukda mezkûr bazergânlar ve cümle dülbendçi esnâfı ittifâklarıyla dülbendciler bazergândan aldıkları baha üzere masârıfı çıkdıkdan sonra onu on bir fâize kanâ‘at ve ibâdullaha bey‘e ta‘ahhüd etmeleriyle işbu sene alındığı vech üzere yemenî ecnâsı merkūm bazergânlar ve dülbendçiler ma‘rifet ve ittifâklarıyla tahrîr ve sebt-i defter olunduğu bi’l-iltimâs huzûr-ı âlîlerine i‘lâm olundu. Fî 10 min-Rebî‘ülâhir sene 1180.