İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 327 Hüküm no: 369 Orijinal metin no: [158-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Tanoş’un ortakları İstaniçe ve Piko ile borç hususunda anlaşmaları Çukurçeşme Simidçisi sulh, 200 guruş Ma‘rûz, Çukurçeşme kurbünde Simidçi arzuhâl eden Tanoş zimmî meclis-i şer‘-i hatîrde müstecir olduğu şerîkleri arzuhâlde mezkûr İstaniçe ve Piko muvâcehelerinde fermân ile fırın-ı mezkûrda şirket-i müfâvaza tarîki üzere şerîk olup işbu meclisde hâzırlar olan Uncu Hasan Ağa ve Molla Mehmed ve Zakar ve Kalos’dan nes’eten iştirâ eylediğimiz sekiz yüz altmış dört guruşluk dakīkin semenini ale’s-seviye edâ lâzım iken merkūmân İstaniçe ve Piko ustalar ma‘rifetleriyle deyn-i mezkûr için beş yüz elli guruş tarh etmeleriyle yedinde olan fetvâ-yı şerîfe mûcebince deyn-i mezkûr mâl-ı şirketimizden berâber edâ olunmak matlûbumdur deyü da‘vâ, onlar dahi cevâbında deyn-i mezkûrdan müdde‘î-i merkūma isâbet eden hissesinden mâ‘adâsı müstakillen kendi deynidir deyü nizâ‘ etmeleriyle merkūm Tanoş muslihûn tavassutuyla deyn-i mezkûrdan dört yüz seksen guruş ve merkūm İstaniçe yüz yetmiş altı guruş <> ve merkūm Piko iki yüz sekiz guruş vermek üzere beynleri bulunmağla bu vech üzere her biri râzılar olup husûs-ı mezkûra müte‘allıka âmme-i da‘vâdan her biri âharın zimmetini ibrâ ve iskāt ve zikr olunan uncular dahi minvâl-i meşrûh üzere deyn-i mezkûru merkūmûndan ahza râzılar olmalarıyla kat‘-ı nizâ‘ eyledikleri rızâlarıyla huzûr-ı âlîlerine i‘lâm olundu. Fî 11 Rebî‘ülâhir sene 1180.