İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 329 Hüküm no: 373 Orijinal metin no: [159-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesib Karagöz mahallesi sakinlerinden Hasan b. Abdullah ile Hatice bt. Abdullah ve Molla Ali’nin birbirlerinin menzillerine olan zararı gidermeye taahhütte bulunmaları Şehzâde kurbünde keşf-i menzil Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Ahmed ve İsmail halîfeler ve sâir ümenâ-yı şer‘le mahmiye-i İstanbul’da şehzâde câmi‘-i şerîfi kurbünde Muhtesib Karagöz mahâllesinde vâki‘ bir sakf altında mebnâ olup biri sâhib-i arzuhâl Hasan b. Abdullah ile zevcesi Hadîce bt. Abdullah ve biri arzuhâlde mezkûr Molla Ali b. Osman tasarruflarında olan iki bâb menzil üzerine varıp mezbûr Molla Ali’nin fevkānî bir bâb odasının bir yan penceresinden mezbûrân Hasan ve Hadîce’nin yine fevkānî makarr-ı nisvân olan sofası görünüp her birinin âhara havâlesi olduğu mu‘âyene olunup lâkin zikr olunan iki bâb menzil def‘aten binâ olunup kadîm ve hâdis olmadığı tarafeynin ikrârlarıyla müte‘ayyen olmağla ikisi dahi şer‘an sütre iktizâ etdikde mezbûr Molla Ali ve merkūmân Hasan ve Hadîce tasarruflarında olan dolma duvar üzerine sütre için tahta perde binâsına ta‘ahhüd eyledikde merkūmân dahi râzılar olup bu vechile kat‘-ı nizâ‘ eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 8 Rebî‘ülâhir sene 1180.