İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 329 Hüküm no: 374 Orijinal metin no: [159-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuna sahillerinden gelen buğdayın fiyatının tesbit olunması Hıntanın fiâtı kat‘ Ma‘rûz, Bu sene-i mübârekede Bahr-ı siyâh iskelelerinden ve Tuna sevâhilinden vürûd eden hıntanın fiâtı husûsu için sâdır olan fermân-ı cihân-mutâ‘ları zü‘amâdan Ali Ağa kulları yediyle vürûd ve imtisâlen Kapan tüccârından akıl ve rüşd sâhibleri nâmına olanlar ile ekmekçi ustaları dâ‘îhâneye ihzâr ve muvâcehelerinde feth ü kırâet olundukda cümlesi sem‘an ve tâ‘aten deyüp hâlâ Kapan’da sefîneleri mevcûd tüccârdan Hacı Kasımoğlu es-Seyyid el-Hâc Ali ve el-Hâc Abdurrahman ve Nalkıran el-Hâc Mustafa ve Esircioğlu el-Hâc Mehmed ve Tığlıoğlu Salih ve el-Hâc Mahmud ve yine el-Hâc Kasımoğlu el-Hâc Mehmed ve Sipâhîoğlu el-Hâc Mustafa ve Zeyreklioğlu Agob ile sefîneleri bahr-ı mezkûr cânibinde olan sâir mazbûtü’l-esâmi tüccâr hıntanın fermân-ı âlîde zikr olunduğu vech üzere fiâtı zikr olunan iskelelerde sene-i sâbıkā misillü kat‘ olunduğuna binâen bu tarafda dahi sene-i sâbıkāda râzı oldukları on dört akçe fâiz ile elli dört akçeye Alçaklar hıntasını ve ona kıyâs ile sâir mahâllerin hıntasına dahi sene-i sâbıkā fîleri üzere râzılar olup ve kat‘-ı pazar eylediklerinde ekmekçi ustaları dahi bu minvâl üzere kabûl ve ibâdullaha tabhı nisâbında narh-ı rûzî üzere ta‘ahhüd edip ve fermân-ı âlîşâna imtisâlen bu gün sefînelerinin hamûlelerini ifrâğa mübâderet ve habbâzîn dahi hıntalarını nakle mübâşeret eyledikleri huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 11 Rebî‘ülâhir sene 1180.