İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 340 Hüküm no: 388 Orijinal metin no: [166-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın bina ettiği menzilinin diğer bir menzile olan zararını gidermesi Tavşantaşı kurbünde Sarrâcishak mahâllesinde keşf-i menzil Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden irsâl olunan keşif nâibimiz müderrisîn-i kirâmdan es-Seyyid Halil Efendi Hâssa mi‘mârlarından İsmail ve diğer İsmail halîfeler ve sâir ümenâ-yı şer‘le mahmiye-i İslambol’da Tavşan kurbünde Sarrâcishak mahâllesinde vâki‘ sâhibe-i arzuhâl Hadîce Hatun bt. İsmail’in tasarrufunda olan menzile varıp huzûr-ı Müslimînde akdeylediği meclis-i şer‘-i hatîrde mezbûre Hadîce Hatun sokak aşırı karşısında menzilini binâ eden arzuhâlde mezkûr diğer Hadîce Hatun bt. Abdullah tarafından vekîl olduğu es-Seyyid Mehmed b. Ahmed ve Musa b. Ali şehâdetleriyle sâbit es-Seyyid İsmail Çelebi b. Molla Ahmed muvâcehesinde müvekkile-i mezbûre diğer Hadîce’nin işbu esnâda binâ ve ihdâs eylediği menzilinin ulyâsında vâki‘ odasının üç orta penceresinde ve vüstâsında kezâlik sakfı üzerinde müceddeden binâ ve ihdâs eylediği tahte’s-semâsında havâlesi olup ve beynimizde olan tarîk dîk olmağla sakfı suyu dahi sakfım üzerine cârî olmağla zarâr-ı şer‘îsini def‘ eylesin deyü iddi‘âsına binâen nazar olundukda fi’l-vâki‘ vech-i meşrûh üzere havâlesi olduğu ve sakfı damlası mezbûre Hadîce’nin sakfının ba‘zı mahâlli üzerine cereyân eylediği mi‘mârân-ı merkūmân ma‘rifetleriyle ba‘de’l-mu‘âyene mezbûr es-Seyyid İsmail bi’l-vekâle rızâsıyla ulyâda vâki‘ mezkûr üç orta pencerenin havâlesini tahta perde ile def‘e ve vüstâdan pencere küşâd etmemeğe ve sakf damlasını dahi sakfın bir mikdâr mahâllini kat‘ ile def‘e ve suyunu dahi oluk ve boru ile icrâya ba‘de’t-ta‘ahhüd muhdes tahte’s-semânın havâlesini def‘e mecâli olmadığından mâ‘adâ mi‘mârân-ı mezbûrân müceddeden tahte’s-semâ ve bu misillü Bacacı bacası ta‘bîr olunur ihdâs eylediği kebîr baca dahi bâ-fermân-ı âlî memnû‘âtdan olup bu bâbda sâdır olan evâmir-i aliyye mûcebince hedm iktizâ eden ebniyedendir deyü bi’l-müşâhede haber verdiklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 20 Rebî‘ülâhir sene [11]80.