İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 339 Hüküm no: 387 Orijinal metin no: [165-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı esnafının Samatya yakınlarında Manoğlu Hamamı kiracısı Yusuf’un esnaflıktan çıkarılması talebleri Manoğlu Hamamı gediği i‘lâmı Ma‘rûz, Ashâb-ı arzuhâlden Hamamcılar Kethüdâsı el-Hâc Mehmed ve Yiğitbaşıları es-Seyyid Mehmed ve Kâtibleri el-Hâc Hasan ve Azablar Hamamcısı el-Hâc Mehmed ve Karaman Hamamcısı Molla Ali ve Kıztaşı Hamamcısı Hâfız Mehmed ve Çinili Hamamcısı Mustafa ve Zincirlikuyu Hamamcısı Musa ve İbrahim Paşa Hamamcısı İbrahim ve Kovacılar Hamamcısı es-Seyyid Mehmed ve Yenibahçe Hamamcısı Ali ve Ali Paşa Hamamcısı Mustafa ve Çelebi Mehmed Ağa Hamamcısı el-Hâc Yakub ve Kādıasker Hamamcısı Ali meclis-i şer‘-i şerîfe ihzâr etdirdikleri Samatya kurbünde Manoğlu Hamamı’nda gediksiz müstecir olan arzuhâllerinde mezkûr Yusuf b. Hüseyin’den mezbûr Yusuf kendi hâlinde olmayıp kadîmden beri beynimizde mer‘î ve mu‘teber nizâmımız Yeniçeri Ağası ma‘rifetiyle müstecir olduğumuz hamamlarda dellâk olanlar birbirlerine kefil ve dellâklara dahi hamamcıları kefil ve hamamcılara ustaları kefil olup ve yeniden esnâfımıza biri duhûl murâd etdikde hamamda gedik ta‘bîr olunur eşyâsı ma‘rifetimiz ile tahrîr ve vech-i meşrûh üzere tekfîl olunmadıkça hamamcı olmamak şurûtundan iken mezbûr Yusuf hâlâ müstecir olduğu hamamda gedik ashâbı olan işbu meclisde hâzır Hüseyin nâm kimesnenin eşyâsını diyâr-ı âharda iken taşra atıp bu vechile hasârete bâ‘is olup ve mezbûr Yusuf bu misillü hareket âdet-i müstemirresi olmağla bundan akdem Galata’da Karaköy Kapısı’nda olan hamamın gediğini Emine nâm Hatun’un iken gediği almak kasdıyla bir takrîble tezevvüc etdikden sonra gedik benim deyü iddi‘â ve mezkûre [166] hatunu beş on kîse akçe hasârete uğratdı deyü teşekkî ve sû-i hâlini ihbâr ve kefili dahi olmadığından mâ‘adâ esnâf-ı mezkûra bundan akdem Çarşamba günü arz odasında huzûr-ı âlîlerinde husûs-ı mezkûr için asıl hamam sâhibesi Hadîce tarafından vekîl ve zevci el-Hâc Abdullah ile murâfa‘a olup esnâf-ı mezkûrenin nizâmlarını sıyâneten mezbûr Yusuf esnâf ma‘rifetiyle ihrâç ve gedik sâhibi mezbûr Hüseyin için hamam-ı mezkûrede ibkā olunmak bâbında re’y buyrulmağla esnâf-ı mezkûrenin nizâm-ı kadîmlerinin adem-i ihtilâli için mezbûr Yusuf’un hamam-ı mezkûrdan ihrâcı iktizâ eylediği iltimâslarıyla huzûr-ı âlîlerine i‘lâm olundu. Fî 21 Rebî‘ülâhir sene 1180.