İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 342 Hüküm no: 392 Orijinal metin no: [167-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbrıslı Yani’nin Yorgi v. Yani hakkındaki alacak iddiasından men olunması 500 guruş ibrâ, Ma‘rûz, Arzuhâl eden Kıbrıslı Yani zimmî Çarşamba günü dîvân-ı âlîlerinde meclis-i şer‘-i şerîfde derûn-ı arzuhâlde merkūm dülger kalfalarından Yorgi v. Yani zimmîden yine dülger kalfalarından gāib ani’l-meclis Kostanti ile İncirli karyesinde vâki‘ ebniye uhdesinde iken masârıflarına malımdan bin sekiz guruş sarf edip beşyüz sekiz guruşunu yedlerinden ahz ve beş yüz guruşunu zimmetlerinde bâkī kalmağla merkūm Yani’nin hissesine isâbet eden iki yüz elli guruşu taleb ederim deyü da‘vâ, ol dahi cevâbında müdde‘î-i merkūm ile yetmiş yedi Receb-i şerîfi’nin on beşinci günü Yeni Han’da odamda masârıf-ı mezkûresinin defteri mûcebince hesâbını görüp zimmetimde yüz otuz beş guruş hakkı zuhûr etmekle ben malımdan teberru‘an on guruş dahi zam ile yüz kırk beş guruş verdiğimde, ol dahi kabz ve ecr-i misline ve cemî‘ masârıfına müte‘allıka âmme-i da‘vâdan benim zimmetimi ibrâ ve cihet-i mezkûreden bende aslâ hakkı kalmadığını ikrâr etmiş idi deyü def‘ini beyana havâle olunmuş idi. Hâlâ merkūm Yorgi dâ‘îhânede def‘-i meşrûhunu udûlden oldukları ehl-i İslâmdan istihbâr olunan Odunkapısı’nda Keresteci Yuvan v. Sefer nâm zimmîler şehâdetleriyle merkūm Yani muvâcehesinde isbât etmeğin mûcebiyle müdde‘î-i merkūm husûs-ı mezkûr için bî-vech mu‘ârazadan men‘ olunduğu mübâşiri Mehmed Emin Çavuş kulları iltimâsıyla huzûr-ı âlîlerine i‘lâm olundu. Fî 23 Rebî‘ülâhir sene 1180.