.:: İstanbul Kadı Sicilleri ::.


İstanbul Mahkemesi 25 Numaralı Sicil (H. 1179-1180 / M. 1765-1767)
cilt: 76, sayfa: 343
Hüküm no: 393
Orijinal metin no: [167-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ceyb-i hümayuna ait İstanbul, Üsküdar, Beykoz ve Uskumru’da bulunan miri tarla ve bostanlar hakkında tahkikat yapılarak kullanıcılarının kayıt altına alınması

Bâ-sah

İstanbul kādısı fazîletlü efendi

Madde-i mezbûrenin temyîz ve tahkīki matlûb olmağla Istabl-ı âmire’den ta‘yîn olunan kâtibin ma‘iyyetine siz dahi ser-kâtib ta‘yîn ve Istabl-ı âmire’de mahfûz defter-i mu‘teberden muhreç iki kıt‘a defterde mastûr olan tarlalar ve besâtîn ve zemînler hudûd ve sınırlarıyla mu‘âyene ve mutasarrıfları yedlerinde olan senedâta nazar ve mu‘teddün-bihâ olmayan senedât tecdîd ve kat‘â senedi olmayanlara müceddeden sened i‘tâ olunarak kimlerin tasarruflarında oldukları isim ve resimleriyle defter ve her husûsu temyîz olunup bu takrîble memûr olanlar celb-i menfa‘at kaydına [168] düşmeyip temşiyet-i emr-i matlûba ihtimâm olunmasını tenbîh ve ba‘de’t-tekmîl keyfiyet-i tahrîri i‘lâm eyleyesiz deyü [buyruldu].

Fî 22 R sene [1]180.

Mîrahor-ı evvel Ağa’nın arzuhâli

Devletlü sa‘âdetlü Sultânım hazretleri sağ olsun. Istabl-ı âmire-i evvele tâbi‘ senevî olan mukāta‘aları ceyb-i hümâyûn-ı şevket-makrûna âid ve râci‘ İstanbul hısnı hâricinde ve dâhilinde ve Üsküdar ve Beykoz ve Uskumru’da vâki‘ Istabl-ı âmire’de mahfûz hatt-ı hümâyûn ile mu‘anven defterde mastûr ve mukayyed mîrî hâslar tarlalarına ve bostanlara işbu iki kıt‘a defter mûcebince bâ-temessük mutasarrıf olanların ba‘zıları senevî ta‘yîn olunan maktû‘ları vermede te‘allül ve ba‘zıları adem-i rağbet birle ketb ü ihfâ ve Sultân Bâyezid tarafından temessük ahz ve ba‘zıları tarlayı bostan ve bostanı tarla eylemeleriyle defterden hâriç ve muhtel ve Devlet-i aliyye Edirne’de oldukça Âsitâne-i sa‘âdet’de Mîrahor-ı evvel Ağa kulları tarafından vekîl bulunan etrâfda vâki‘ mîrî çayırların ba‘zı bî-hâsıl olan yerlerden ifrâz ve tarla olmak üzere verdikleri temessükât kayıdları ve ashâbları nâ-ma‘lûm olmağla ceyb-i hümâyûn-ı şevket-makrûn malına kesr ve tedennî gelmekle merâhim-i aliyyelerinden mercûdur ki İstanbul kādısı efendi tarafından bir kâtib ve Istabl-ı âmire’den bir mu‘temedün-aleyh kâtib kulları ta‘yîn ve mezkûr hâslar tarlaları ve bostanları müşâhede ve yedlerinde olan temessüklerine nazar ve temessükü olmayanlara dahi müceddeden temessük i‘tâ ve hatt-ı hümâyûn ile deftere kayd ve hıfz etdirilmek bâbında emr ü fermân devletlü Sultânım hazretlerinindir.

Bende Selim

Mîrahor-ı Evvel