İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 347 Hüküm no: 399 Orijinal metin no: [169-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun Vakfı’ndan Elvanzade ve İbni Müderris mahallelerinde yanmış olan menzillerin yerine yenisinin inşa olunması Elvanzâde mahâllesinde keşif Ma‘rûz, Sâdır olan fermân-ı âlîlerine imtisâlen savb-ı şer‘-i enverden keşif nâibimiz müderrisîn-i kirâmdan es-Seyyid Halil Efendi dâ‘îleri irsâl, ol dahi hâssa mi‘mârlarından Abdullah ve Ahmed Halîfe ve sâir ümenâ-yı şer‘le mahmiye-i İstanbul’da nezâret-i [170] dâ‘îlerinde olan evkāfdan Havva Hatun Vakfı’ndan ba‘zı mahâlli Elvanzâde mahâllesinde ve ba‘zı mahâlli İbni Meddas mahâllesinde vâki‘ bir tarafdan ba‘zan Haremeyn-i muhteremeyn Vakfı’ndan Ahmed Ağa tasarrufunda olan arsa ve ba‘zan Süleyman Efendi Vakfı’ndan Mehmed Ağa veresesi arsası ve bir tarafdan ba‘zan el-Hâc İbrahim tasarrufunda olan menzil ve ba‘zan mezbûr el-Hâc İbrahim hemşîresi Saliha Hatun tasarrufunda olan menzil ve ba‘zan bakkāl el-Hâc Halil arsası ve iki tarafdan tarîk-i âm ile mahdûd zikri âtî muhterik menzil arsası üzerine varıp arsa-i mezkûre hâlâ bir menzil arsası iken menâzil-i adîdeden müctemi‘ olmağla mütevellîsinden icâreteyn ile birer menzil arsası isticâr ve tefevvüz eden ashâb-ı arzuhâl Mehmed Ali ve diğer Mehmed ve Rukıye Hatun vakf-ı mezbûr mütevellîsi Ali Efendi b. Yusuf hâzır olduğu hâlde takrîr-i kelâm edip arsa-i mezkûre fi’l-asl menâzil-i adîdeden müctemi‘ bir bâb hâne olup muhterik oldukda verâsında olan menâzil ashâbına nezâret peydâ olup şimdi kadîmîsi üzere biz müteehhilîn menzilleri binâ eylemek murâd eylediğimizde ashâb-ı menâzil-i merkūme nezâretlerine mâni‘ olduğu ecilden bir hâne arsasına iki üç beş hâne yapılmak hilâf-ı fermândır deyü bizi men‘ murâd etmeleriyle kadîmîsi vukūfu olan kimesnelerden istîhbâr ve mezbûrûnun nezâretimize mâni‘ olur deyü hilâf-ı şer‘-i şerîf mümâna‘atları ref‘ olunmak matlûbumuzdur dedikde mahâlle-i mezbûre ahâlîsinden ve sâir vukūfu olan Müslimîn Salih Paşa İmamı Mustafa Efendi ve Elvanzâde İmamı diğer Mustafa Efendi ve Salih Paşa Müezzini Halil Efendi ve Elvanzâde Müezzini Molla Ebubekir ve Sarrâcbaşı-yı sâbık Ahmed Ağa ve Kapan tüccârından el-Hâc İbrahim ve es-Seyyid Mehmed Halîfe ve Yusuf Çavuş Ağa ve Sarrâcbaşı Hasan Ağa ve Takyeci Molla Feyzullah ve Duhânî Mustafa Çelebi ve Kerestecizâde Molla Mustafa ve Düğmeci Osman Çelebi ve Ekmekçizâde el-Hâc Mehmed ve Gözlemeci Mehmed Beşe nâm kimesneler hâzirûn olup fi’l-asl arsa-i mezkûrenin Elvanzâde mahâllesinde olan tarafında el-Hâc Musa ve el-Hâc Ahmed ve evlâd-ı Arab’dan el-Hâc Hantuslar ta‘bîr olunur iki kimesneler ve Fındıkçı el-Hâc Ali ve Bâki Çelebi ve İbni Meddas mahâllesinde olan tarafında Tuğcubaşı ve Mehmed Reis ve Abdülbaki Çelebi nâm kimesneler menzilleri olup ve menâzil-i merkūmenin ekserînin senedleri dahi olmağla bundan mukaddem muhterik oldukda el-Hâc Mehmed nâm kimesne arsa-i mezkûre üzerine bir menzil binâ ve yetmiş dokuz senesinde ol dahi muhterik olmağla arsa-i mezkûre üzerine bir bâb menzil binâsına kimesne rağbet etmeyip mu‘attal kalmış idi. Hâlâ kadîmîsi üzere müteehhilîn menzilleri binâ olunduğu sûretde kimesneye zarâr-ı şer‘îsi yokdur deyü haber verdiklerini mezbûr dâ‘îleri mahâllinde tahrîr ve gelip inhâ eylediği huzûr-ı âlîlerine i‘lâm olundu. Fî 20 Rebî‘ülâhir sene 1180.