İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 348 Hüküm no: 400 Orijinal metin no: [170-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Korucu Mehmed Çelebi Vakfı’ndan Ayvansaray’da sur bitişiğindeki cami ve imam menzilinin depremden dolayı kullanılamaz hale gelmesi Ayvansaray kurbünde keşf-i hisar Ma‘rûz Ayvansaray Kapısı hâricinde bundan akdem taraf-ı hazret-i cihândârîden ta‘mîr olunan Korucu Mehmed Çelebi Vakfı’ndan cidâr-ı kal‘a ittisâlinde vâki‘ câmi‘ üzerinde ve kurbünde vâki‘ imamına meşrûta menzil üzerinde olan hisarbeçeleri zelzeleden mâil-i inhidâm ve câmi‘-i mezkûr dahi cidâr-ı kal‘adan ayrılıp ve mihrâb tarafı ve nerdüban başı dahi münşak olmağla keşif ve hedm ve ta‘mîr olunması için imamı ve mürtezikası istid‘âlarıyla sâdır olan fermân-ı âlîlerine imtisâlen kıbel-i şer‘-i şerîfden Kâtib Ali Efendi irsâl, ol dahi mi‘mâr hulefâsından Hasan ve İsmail halîfeler ile mahâll-i mezkûra varıp mu‘âyene ve misâha eylediklerinde mârrü’z-zikr câmi‘-i şerîf üzerinde olan tûlen on ve arzen bir zirâ‘ altı aded ve menzil-i mezkûr üzerinde olan tûlen yedi ve arzen kezâlik bir zirâ‘ iki hisarbeçe ki cem‘an sekiz aded hisarbeçenin hedmi muktezî olup ve fi’l-hakīka câmi‘-i mezkûr dahi dört parmak taşra çıkıp mihrâb tarafı ve nerdüban başı münşak olmağla uskunduraya alınıp ta‘mîre muhtâc olduğunu menzil-i mezkûrun üzerinde olan tahtaların bir mikdârı menzil-i mezkûrun üzerine münhedim olup ba‘zı mahâllini tahrîb etmekle menzil-i mezkûr dahi kābil-i süknâ olmadığı ve zikr olunan hisarbeçeler hedm olunmadığı sûretde [171] münhedim ve etrâfına mûceb-i hasâret olacağını mi‘mârân-ı mezbûrân ve sâir civârında olan Müslimîn haber verdiklerini mezbûr dâ‘îleri mahâllinde tahrîr ve gelip inhâ eylediği huzûr-ı âlîlerine i‘lâm olundu. Fî 26 Rebî‘ülâhir sene 1180.