İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 351 Hüküm no: 404 Orijinal metin no: [172-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa ile Ahmed Efendi’nin birbirlerinin menzillerine olan zararı gidermek için taahhütte bulunmaları Keşf, der-kurb-ı Yenibahçe Ma‘rûz, Sâdır olan fermân-ı âlîlerine imtisâlen cânib-i şer‘-i hatîrden keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından es-Seyyid İsmail ve diğer İsmail halîfeler ve sâir ümenâ-yı şer‘le mahmiye-i İstanbul’da Yenibahçe kurbünde Karabaş mahâllesinde vâki‘ sâhib-i arzuhâl Hasan Ağa b. el-Hâc Mehmed’in mülk menziline varıp huzûr-ı Müslimînde akdeylediği meclis-i şer‘-i enverde menzil-i mezkûrun fevkānî sofasının hâlâ mesdûd olan dört orta penceresinden arzuhâlde mezkûrü’l-ism rûznâme baş halîfesi Ahmed Efendi b. Abdullah’ın menzil-i mezkûr civârında vâki‘ mülk menzilini makarr-ı nisvân olan bahçesi odasına [173] ve fevkānî harem odaları pencerelerine havâlesi olduğu ve mezbûr Ahmed Efendi’nin dahi fevkānî bir bâb odasının duvarı camı mahâllinde olup kanatlı açılır penceresinden merkūm Hasan Ağa’ın makarr-ı nisvân olan sofa ve dehlizine havâlesi olduğu ba‘de’l-mu‘âyene mezbûr Hasan Ağa zikr olunan dört aded sofası pencerelerini bundan böyle dahi rızâsıyla dolma duvar ile sed eylemeğe ta‘ahhüdünden sonra mûmâ-ileyh Ahmed Efendi dahi mezkûr kanatlı penceresi mahâlline verâsı rü’yet olunmaz yerli havâle camı vaz‘ eyleyip ve mezbûr Hasan Ağa’nın menzil-i mezkûru ittisâlinde icrâ eylediği kârizi zarârını dahi def‘a mübâderet eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 27 Rebî‘ülâhir sene [11]80.