İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 350 Hüküm no: 403 Orijinal metin no: [172-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebabçı Ali’nin han şeklinde inşa etmiş olduğu bekâr odalarının yıkılarak eskisi gibi sütçü dükkânı yapılması Keşf, der-kurb-ı Kapan-ı dakīk Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden mürsel Ali Efendi mi‘mâr hulefâsından el-Hâc Mustafa ve İsmail halîfeler ile Unkapanı dâhilinde Yavuzer Sinan mahâllesinde kadîmden südçü kârhânesi olup hâlâ hilâf-ı fermân-ı âlî bekâr odaları binâ olundu deyü ahâlî-i mahâllenin arzuhâlleriyle iştikâ eyledikleri odalara varıp mu‘âyene eyledikde mahâll-i mezkûr Kiremid sakflı sundurma ve tahtında iki kerevit ve bir südçü ocağı ile südçü kârhânesi olup bin yüz altmış dokuz senesi harîkinde muhterik ve arsa-i sırfe kalmağla işbu Kebabçı el-Hâc Ali b. Mahmud bu esnâda kârhâne-i mezbûrun vaz‘-ı kadîmini tağyîr ve kendi malıyla hilâf-ı emr-i âlî hân sûretinde müceddeden fevkānî üç bâb bekâr odaları ve bir sofa ve tahtânî iki sundurma ve bir kârgîr matbâh ocağı binâ ve tekmîl ve içlerine bekâr tâifesi iskân eylediğinden bir vechile emn u rahatları olmadığı ashâb-ı arzuhâl ahâlî-i mahâlle inhâ ve ref‘ olunmasını istid‘â ve mi‘mârân-ı mezbûrân dahi ebniye-i mezkûre fermân-ı âlîşân ile memnû‘ olan ebniyeden olduğunu ihbâr etmeleriyle mezbûr el-Hâc Ali dahi ihdâs eylediği ebniye-i mezkûreyi tağyîr ve kadîmî üzere südçü kârhânesi binâ edip hilâf-ı fermân-ı âlî bekâr tâifesi iskân etmemek üzere ta‘ahhüd eylediğini mezbûr dâ‘îleri inhâ ve ahâlî-i mahâlle-i mezbûre ile mezbûr el-Hâc Ali ihtiyâten tekrâr meclis-i şer‘-i şerîfe ihzâr ve istintâk olundukda hakīkat-i hâl vech-i meşrûh üzere olduğunu tasdîk ve mezbûr el-Hâc Ali dahi ebniye-i mezkûreyi tağyîre mübâderet edeceği bi’l-iltimâs huzûr-ı âlîlerine i‘lâm olundu. Fî 29 Rebî‘ülâhir sene 1180.