İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 353 Hüküm no: 408 Orijinal metin no: [174-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manoğlu Hamamı’nın, kiracısı bulunan Yusuf’un mahkeme kararıyla hamamdan çıkarılarak eski kiracı olan Hüseyin’e teslim olunması Manoğlu Hamamı Ma‘rûz, Samatya kurbünde Manoğlu Hamamı demekle ma‘rûf hamamın sâhibesi Hadîce nâm hatun’un vekîli zevci Abdullah’dan arzuhâl eden Hüseyin üç sene mukaddem hamam-ı mezkûru üç sene tamâmına dek isticâr ve kabûl ve bir sene zabt edip diyâr-ı âhara gider oldukda kayınatası Ahmed’i yerine tevkîl ve diyâr-ı âhara gitdikde mezbûr Abdullah hamam-ı mezkûrda hâlâ müsteciri olan Yusuf’a icâr murâd etmekle mezbûr Hüseyin’in kayınatasını yetmiş yedi senesinde İslambol kādısı Bekir Efendi huzûruna getirip mezbûr Hüseyin’in iki sene dahi müddet-i icâresi bâkiye iken mezbûr Ahmed için müşâhereten müstecirimdir deyü mezbûr Hüseyin’in gıyâbında fesh-i icâre etdiğine i‘lâm alıp hamamdan mezbûr Hüseyin’in gediği olan peştemâllerini ve sâir hamam âlâtını kayınatasına ihrâç etdirmekle mezbûr Hüseyin Çarşamba günü Arz Odası’nda huzûr-ı âlîlerinde vekîl-i mezbûr Abdullah ile murâfa‘a olup hamamlarda müddet-i icâresi tamâm olmayan müstecirin gediğini bu vechile ihrâç, hamamcıların nizâm-ı kadîmlerine mugāyir olduğu hamamcılar kethüdâsı ve ustaları ihbâr ve hamam-ı mezkûre yine mezbûr Hüseyin’e icâr olunmak üzere re’y buyrulmuş iken vekîl-i mezbûr hamam-ı mezbûr Hüseyin’e teslîmden imtinâ‘ ve içinde olan Yusuf dahi ta‘annüt etmekle hamamcılar mezbûr Yusuf’dan hilâf-ı nizâmları hareketi için emniyetleri olmayıp ve kefil dahi olmamalarıyla hamamdan ihrâcını istid‘â etdikleri i‘lâm olunmuş iken gerek mezbûr Yusuf ve gerek vekîl-i mezbûr ta‘annütlerinde ısrâr etmeleriyle Çarşamba günü arz odasında tekrâr murâfa‘alarında hamamcıların nizâm-ı kadîmlerini sıyâneten mezbûr Yusuf ihrâç ve yerine mezbûr Hüseyin için icâr ve ikāmet olunmak bâbında sâdır olan fermân-ı âlîlerine imtisâlen taraf-ı dâ‘îlerinden Mehmed Emin Efendi irsâl, ol dahi izzetlü Yeniçeri ağası tarafından hamamlar husûsuna ta‘yîn olunan ocak yazıcılarından İbrahim kulları ve sâir Müslimîn ile hamam-ı mezkûra varıp akdeylediği meclis-i şer‘-i şerîfde mezbûr Yusuf fesh-i icâre ve hamam-ı mezkûrdan çıkmağa râzı olmağla re’yiyle içinde olan eşyâsını defter ve yedine teslîm oldukda ol dahi kabz ve hamam-ı mezkûru tahliye etmeğe fermân buyrulduğu vech üzere mezbûr Hüseyin’in gedik ta‘bîr olunur eşyâsını vaz‘ ve hamam-ı mezkûrda ikāmet olunduğu mezbûr dâ‘îleri gelip inhâ eylediği bi’l-iltimâs huzûr-ı âlîlerine i‘lâm olundu. Fî 2 min-Cumâdelûlâ sene [11]80.