İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 356 Hüküm no: 413 Orijinal metin no: [176-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın zeytinci esnaflığından ihraç olunması Zeytinci esnâfından ihrâc Ma‘rûz, Ayazma Kapısı hâricinde vâki‘ zeytinciler esnâfından kethüdâları Osman ve yiğitbaşıları el-Hâc İsmail mahâll-i mezkûrda Zeytinci es-Seyyid Hasan’dan kendi hâlinde olmayıp nizâmımızın mugāyiri hareketde olup nizâm-ı kadîmimizin ihtilâline bâ‘is olmağla nush u pend edenlere hadîdü’l-lisân olmağla hilâf-ı şer‘-i şerîf şetm ve ırzlarını hetk etmekle yetmiş dört senesinde mezbûrun keyfiyet-i hâlini meclis-i şer‘-i şerîfe inhâ eylediğimizde hilâf-ı şer‘-i şerîf hareket etmemek üzere mezbûre tenbîh olunup i‘lâm dahi olunmuş iken mezbûr es-Seyyid Hasan mütenebbih olmayıp ef‘âl-i sâbıkāsında ısrâr ve hâlâ nizâmımıza mugāyir hareket etmekle bi’l-külliye emniyetimiz meslûb olmuşdur deyü teşekkî ve esnâf-ı mezkûreden el-Hâc Mehmed’e ve el-Hâc Süleyman’a ve el-Hâc Halil’e ve Molla Abdullah ve Hüseyin ve Ali Yazıcı ve Molla Mehmed ve el-Hâc Ali ve el-Hâc Yahya ve Molla Hasan nâm kimesneler hakīkat-i hâl minvâl-i meşrûh üzere olduğunu muvâcehesinde ihbâr ve şer ve mazarrâtının irtifâ‘ı için mahâll-i mezkûrdan mezbûr Hasan’ın ihrâcı bâbında fermân-ı âlîleri sudûrunu istid‘â eyledikleri iltimâslarıyla huzûr-ı âlîlerine i‘lâm olundu. Fî 2 Cumâdelûlâ sene 1180.