İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 358 Hüküm no: 416 Orijinal metin no: [177-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı esnafı nizamı Hamâmlar nizâmı Ma‘rûz, Mahmiye-i İslambol’da ve havâlîsinde vâki‘ hamamların ez-kadîm nizâmları ibâdullah hamama girdikde lâbis oldukları esvâbların ve üzerlerinde bulunan emvâl ve eşyâlarını taşra câmekânda bırakmağla gerek hamamcılar ve gerek nâtur ve dellâklar mü’temen mu‘temed kimesneler olmak lâzıme-i hâlden olduğu ecilden dergâh-ı âlî yeniçeri ağası tarafından ocak yazıcısı ma‘rifetiyle dellâklar birbirlerine ve hamamcıları dahi dellâklarına ve sâir hademe-i hamama tekfîl olunup ve bir hamamda müstecir olup gedik ta‘bîr olunur hamam eşyâsına mâlik olanlar hamamdan çıkıp âhara verilmek murâd olundukda eşyâ-yı mezkûre kethüdâları ve sâir ustaları ma‘rifetleriyle tahrîr ve takvîm olunup hamam umûrunu idâreye kādir kethüdâ ve ustaları kefil oldukları kimesneye bey‘ ve bu tarîkle ikāmet olunup hamamcılar dahi hademe-i hamamdan fesâd ve mel‘aneti zâhir olanları adem-i himâyet ve edevât-ı hamamın dâimâ nezâfet, tahâretine ihtimâm ve dikkat ve peştemâl ve sileceklerin hark u şakdan sâlim ve tûl ve arzı setr-i avrete vâfî olacak mikdârını pâk ve nazîf olarak isti‘mâl edegelip bu nesak-i müstahsen üzere görülür iken bir müddetden beri ba‘zı hamam sâhibleri icâre-i misliyesinden ziyâde kirâların artırmak irâdesiyle şurût-ı mezkûreye adem-i ri‘âyet ile müstecirlerinin müddet-i icâreleri tamâm olmadın hilâf-ı şer‘-i şerîf ihrâc ve mechûlü’l-ahvâl ve ber-vech-i meşrûh idâreye adîmü’l-iktidâr erâzile icâr ve müstecir-i sâlifin müddet-i icâre tamâmına dek tedârik etdiği odun ve sâir levâzımı telef olmağla ızrâr etmeleriyle bi’l-cümle hamamcılar tâifesi Çarşamba günü Arz Odası’nda huzûr-ı âlîde teşekkî ve arzuhâl etdiklerinde bu husûsun fi’l-hakīka zarâr ve nef‘i âmme-i ibâdullaha âid ve râci‘ olmağla meşrû‘ ve ma‘kūle muvâfık nizâm-ı müstahsene rabt ve ifrâğı lâbüd ve lâzım olduğuna binâen arzuhâlleri bâlâsına sâdır olan fermân-ı âlîlerine imtisâlen taraf-ı dâ‘îlerinden Mehmed Emin Efendi ve izzetlü yeniçeri ağası tarafından bu husûsa müte‘ayyin İbrahim Yazıcı ve tâife-i mezbûre kethüdâları ve yiğitbaşıları ve du‘âcıları ma‘iyyetiyle İstanbul ve Eyüb ve Galata ve Üsküdar kazâlarında olan hamamların sâhibleri ve müstecirleri ve icâreleri ve kirâları tahrîr ve defter olunup fî-mâ-ba‘d bâlâda bast olunan şurûtlarına ri‘âyet ve hilâfı üzere hareket edenleri adem-i himâyet ve hamam sâhiblerine icâre-i misliyelerini edâda mümâtaleden mücânebet üzere hareket etmek üzere cümlesi ta‘ahhüd edip ve hamam sâhiblerinden ba‘zıları hamamlarının icâre-i misliyesini edâ eder iken kirâlarını artırmağla gadr etmemek ve işbu şurût-ı nizâm-ı sâbıkāları mer‘î ve mu‘teber olmak için defterleri Başmuhâsebe’ye kayd ve yedlerine tuğrâlı emr-i âlîşân ihsân buyrulmasını istid‘â eyledikleri huzûr-ı âlîlerine i‘lâm olundu. Fî 9 Cumâdelûlâ sene 1180.