İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 364 Hüküm no: 425 Orijinal metin no: [180-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğazkesen kalesinde hapsedilen Hasan Yazıcı ve İmam Mustafa’nın serbest bırakılmaları Ma‘rûz, Langa Yenikapı Asel İskelesi’nde sermâyeci olup Amasya ve yerli üzümünün her yüz vakiyesini narhından ziyâde fürûht etmekle tenbîh olundukda itâ‘at etmediğinden mâ‘adâ adem-i itâ‘at ve ta‘annüdü iskelesi ahâlîsi dahi haber vermeleriyle Rebî‘ülâhir’in yirmi sekizinci günü i‘lâm olundukda te’dîbleri için Boğazkesen Kal‘ası’na vaz‘ olunan Hasan Yazıcı ve İmam Mustafa nâm kimesneler için müddet-i mezkûreden beri te’dîb olundukları ihbâr ve fîmâ-ba‘d mahzenlerine gelen üzümleri narhdan ziyâdeye bey‘ etmemelerine ve nefslerine pazarbaşı ve iskele-i mezbûreden mazbutü’l-esâmi kimesneler kefil olmalarıyla kefâletleri tescîl olunup mezbûrân Hasan ve Mustafa’nın afv ü ıtlâkını istid‘â [181] eyledikleri iltimâslarıyla huzûr-ı âlîlerine i‘lâm olundu. Fî 13 Cumâdelûlâ sene 1180.