İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 366 Hüküm no: 428 Orijinal metin no: [182-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve Hatice’nin Fatıma aleyhindeki menzil kirası ve satış davalarının ispat için tehir olunması Ma‘rûz, Nezâret-i dâ‘îlerinde olan evkāfdan Kara Davud Paşa Vakfı’ndan Aksaray’da Horhor kurbünde vâki‘ ma‘lûmü’l-hudûd menzil arzuhâlde mezkûre Fâtıma bt. Abdullah üzerinde iken yetmiş senesinde Rukıye ve kızı Emetullah’a bâ-re’y-i mütevellî ferâgat etdikden sonra mezbûre Emetullah fevt oldukda hissesi anası mezbûre Rukıye’ye geçip ba‘dehû mezbûre Rukıye dahi fevt olmağla kızları sâhibetey-i arzuhâl Âişe ve Hadîce’ye intikāl etmekle mezbûretân Âişe ve Hadîce taraflarından vech-i âtî üzere da‘vâya vekîl-i müseccelleri İbrahim dâ‘îhânede meclis-i şer‘-i hatîrde zâtı mu‘arrefe mezbûre Fâtıma ile vakf-ı mezbûr mütevellîsi hâzır olduğu hâlde terâfu‘larında menzil-i mezkûru târîh-i mezkûrda mezbûre Fâtıma müteveffât-ı ûlâ Emetullah ve Rukıye’ye yedi yüz guruş bedel-i makbûz mukābelesinde ferâğ-ı kat‘î ile ferâğ ve ba‘de’t-tahliye her şehr dörder guruş icâre ile kabûl ve icâre-i mezkûreden işbu Cumâdelûlâ gurresine gelince bir senelik kırk sekiz guruş zimmetinde müctemi‘ olmağla bi’l-vekâlet taleb ederim deyü da‘vâ ve mezbûre Fâtıma cevâbında benim mezbûre Emetullah ile anası mezbûre Rukıye’ye iki yüz guruş karzdan deynim olmağla menzil-i mezkûru mukābelesinde ferâğ bi’l-vefâ tarîkiyle ferâğ etmiş idim deyüp ziyâde beş yüz guruş kabzı ile akd-i icâre-i mezkûreyi inkâr ve ferâğ-ı mezkûrun ber-vech-i muharrer vefâen olduğu lede’t-tezkiye udûlden oldukları ihbâr olunan mahâlle-i mezbûrede sâkin Kaşıkçı el-Hâc Halil b. Ali ve Yenikapı’da manav İsmail b. Mahmud nâm kimesneler şehâdetleriyle isbât etmeğin vekîl-i mezbûr, mezbûre Fâtıma’nın ziyâde beş yüz guruş kabz ile menzil-i mezkûru ba‘de’t-tahliye her şehr dörder guruş icâre ile isticârına beyyineye havâle olunduğu bi’l-iltimâs huzûr-ı âlîlerine i‘lâm olundu. Fî 11 Ca sene 1180.