İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 371 Hüküm no: 436 Orijinal metin no: [185-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenikapı dahilinde bulunan miri arsanın Bosnalı Hasan Ağa Vakfı arsası ile birlikte müzayede olunması Langa Yenikapısı kurbünde Bosnavî Hasan Ağa Vakıf arsası mütevellîyesi itâ‘at eylemediği i‘lâm. Ma‘rûz, Mukāta‘alı mîrî arsalardan Langa Yenikapısı dâhilinde vâki‘ arsaya Zeyneb nâm hatun mahlûlünden mutasarrıfe olan Ümmügülsüm arzuhâliyle arsa-i mezkûre Bosnavî Hasan Ağa Vakfı arsasıyla müşâ‘ ve mahlût olmağla bundan akdem keşif olundukda ifrâz olunduğu sûretde mîrî arsa tarafına kapı mahâlli olmayıp mütevellîyesi dahi icâresiyle kapı mahâlli vermemekle mîrî arsa ile vakıf arsa ma‘an mezâda verilip âhara fürûht olunmak üzere sa‘âdetlü defterdâr efendi telhîsiyle sâdır olan fermân-ı âlîlerine imtisâlen vakf-ı mezkûr mütevellîyesi çavuş kulları ma‘rifetiyle dâ‘îhâneye ihzâr ve istintâk olundukda mîrî arsa tarafına icâre-i misliyesiyle kapı mahâlli vermede inâdında ısrâr edip ve fermân-ı âlîşânı tenfîz için iki[si] ma‘an müzâyede olunmak üzere dellâlbaşıya verilip müzâyede olunur iken mütevellîye-i mezbûre tekrâr ihzâr için çavuş kullarıyla muhzır irsâl olundukda mütevellîye-i mezbûre menzilinde ihtifâ ve ihzârı mümkün olmadığı bi’l-iltimâs huzûr-ı âlîlerine i‘lâm olundu. Fî 25 min-Cumâdelûlâ sene 1180.