İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 372 Hüküm no: 437 Orijinal metin no: [186-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe’nin, annesi Safiye aleyhindeki menzil davasının zaman aşımına uğraması Otuz iki sene mukaddem fevt olan Hacı Osman Bey vereseleri da‘vâ eylediği mesmû‘a olmadığı Ma‘rûz, Bin yüz kırk sekiz senesinde fevt olan el-Hâc Osman nâm kimesnenin sulbiye kızı olup babasının fevtinde sekiz yaşında sagīre bulunduğu ikrârıyla sâbit ve zâtı mu‘arrefe olan sâhibe-i arzuhâl Âişe nezâret-i dâ‘îlerinde olan evkāfdan Nasuh Bey vakfından Atmeydanı kurbünde Firuzağa mahâllesinde vâki‘ ma‘lûmü’l-hudûd menzile Zeyneb nâm hatun ferâğından bâ-ma‘rifet-i mütevellî bi’l-icâreteyn vâzı‘atü’l-yed olan anası zâtı mu‘arrefe Safiye bt. Mehmed mahzarında menzil-i mahdûd-ı mezkûr babam müteveffâ-yı mezbûr el-Hâc Osman’ın taraf-ı vakf-ı mezbûrdan tasarrufunda iken târîh-i mezkûrda fevt oldukda bana ve karındaşlarım es-Seyyid Mehmed ve Havva’ya âdiyen intikāl etmiş iken anam mezbûre Safiye menzil-i mezkûru üzerine etdirmekle hissemi istihkāk vechi üzere taleb ederim deyü da‘vâ, mezbûre Safiye cevâbında menzil-i mezkûr harâbe müşrif olup ta‘mîrine evlâdım mezbûrunun mâlları olmayıp ben vasîleri olmağla âhara ferâğ murâd eylediğimde menzil-i mezkûrun tâlibleri bedel-i misli mikdârı verecekleri meblağı sagīrûn-ı mezbûrûna teberru‘an vermeleriyle âhara ferâğ haklarında enfa‘ olmağla bi’l-izni’ş-şer‘ târîh-i mezkûrda beş yüz guruş bedel-i müteberru‘ mukābelesinde mezbûre Zeyneb’e ferâğ ve beş yüz guruş bedelden hissesini işbu müdde‘iye-i mezbûre Âişe’nin hîn-i tezvîcinde kadr-ı ma‘rûf cihâzına harc u sarf edip ba‘dehû mezbûre Zeyneb’den ben tefevvüz edip ve hattâ mezbûre Âişe dahi bu müddetde bilâ-özr sükût ve terk-i da‘vâ etmiş idi deyü hakīkat-i hâl minvâl-i muharrer üzere olduğunu mahâlle-i mezbûre ahâlîsinden mazbûtü’l-esâmi Müslimîn haber verdiklerinden mâ‘adâ mezbûre Âişe dahi müddet-i mezkûrede bilâ-özr-i şer‘î sükût ve terk-i da‘vâ eylediğini ikrâr u i‘tirâf etmeğin bu makūle âdiyen intikāl eden menzil istihkākı da‘vâsından on beş sene bilâ-özr terk olunan da‘vânın bilâ-emr istimâ‘ından hükkâm memnû‘lar olmağla müdde‘iye-i mezbûre Âişe husûs-ı mezkûr için mu‘ârazadan men‘ olunmak iktizâ eylediği bi’l-iltimâs huzûr-ı âlîlerine i‘lâm olundu. Fî 25 Cumâdelûlâ sene 1180.