İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 376 Hüküm no: 444 Orijinal metin no: [188-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belgrad Kadısı Kethüdazade Mehmed Said Efendi’nin Garik Ali Vakfı Mütevellisi Yakub’a olan borcunun tecil olunması Belgrad Mollası Kethüdâzâde’den hukūk Ma‘rûz, Bâ-işâret-i aliyye sâdır olan fermân-ı âlîlerine imtisâlen kıbel-i şer‘-i şerîfden mürsel Hâfız Mehmed Emin Efendi mahmiye-i İslambol’da Muhtesib Karagöz mahâllesinde vâki‘ mevâlî-i izâmdan hâlâ Belgrad Kādısı Kethüdâzâde Mehmed Said Efendi sâkin olduğu menzile varıp huzûr-ı Müslimînde akdeylediği meclis-i şer‘-i şerîfde mûmâ-ileyh Mehmed Said Efendi’nin cihet-i şer‘den bâ-temessük Garîk Ali Vakfı mütevellîsi sâhib-i arzuhâl es-Seyyid Yakub Efendi’ye mâl-ı vakf-ı mezkûrdan beş yüz guruş ve kelâm-ı kadîm semeninden yetmiş beş guruş ki cem‘an beşyüz yetmiş guruş deyni olduğu lede’l-murâfa‘a ikrârıyla sâbit oldukdan sonra deyn-i mezkûrun yüz on guruşunu eşyâ ile edâ ve bâkī dört yüz altmış guruşunu târîh-i i‘lâmdan on dört ay tamâmında edâya istimhâl eyledikde mütevellî-yi merkūm dahi müddet-i mezkûre tamâmına dek imhâl edip kat‘-ı nizâ‘ eyledikleri mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 28 Cumâdelûlâ sene 1180.