İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 376 Hüküm no: 443 Orijinal metin no: [188-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Hüseyin ile ortakları Mehmed ve İsmail’in birbirleri aleyhindeki davalarından vazgeçmeleri Ma‘rûz, Okçularbaşı’nda Parmakkapı kurbünde Manav Hüseyin meclis-i şer‘-i şerîfde şerîkleri arzuhâl eden el-Hâc Mehmed ve İsmail’den altı aydan beri mezbûrân ile şerîk olup ve dükkânımızda bey‘ eylediğimiz eşyâ fâidesinden benim hisseme otuz guruş isâbet etmiş iken mezbûrân ketm edip ancak on guruş isâbet eder deyü bana gadr murâd ederler deyü da‘vâ ve mezbûrân dahi inkârlarından mâ‘adâ mezbûr Hüseyin kendi hâlinde olmayıp ve bize âr lâhık olur elfâz ile şetm ve ırzımızı hetk eder deyü da‘vâya tasaddî etmeleriyle beynleri bulunup mezbûr Hüseyin ziyâde da‘vâsından fâriğ ve mezbûrânın zimmetlerini ibrâ etdikde onlar dahi şetm da‘vâsından mezbûr Hüseyin’in zimmetini ba‘de’l-ibrâ mahâll-i mezkûrda dükkân ashâbından Yaycıbaşı Ahmed ve el-Hâc Hüseyin ve Abdullah ve Ali ve Okçu Hamza ve Osman ve Mustafa ve diğer Ali ve Balmumcu el-Hâc Bekir ve el-Hâc Süleyman ve Manav Osman ve Manav Hamza ve es-Seyyid Mustafa ve Pazarbaşı el-Hâc Yusuf ve Ali Yazıcı nâm on altı nefer kimesneler mezbûr Hüseyin’in kendi hâlinde olmağla hüsn-i hâlini haber verdikleri bi’l-iltimâs huzûr-ı âlîlerine i‘lâm olundu. Fî 28 Cumâdelûlâ sene 1180.