İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 377 Hüküm no: 446 Orijinal metin no: [189-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağrefeli Dimo’ya olan borcunu ödemesi hususunda Yanko’ya tenbihte bulunulması Selanik Bakkālının hukūk 448 [guruş] Ma‘rûz, Arzuhâl eden Ağrefeli Dimo v. Yorgi mahmiye-i İslambol’da meclis-i şer‘-i hatîrde Selanik’de bakkāl olup hâlâ mahmiye-i mezbûrede misâfir olan derûn-ı arzuhâlde mezkûrü’l-ism Yanko v. Dimo muvâcehesinde merkūm Yanko <> iki sene mukaddem Selanik’de Tahte’l-kal‘ada kendüye sermâye etmek için malımdan yedimde olan temessükü mantûkunca dört yüz kırk sekiz guruş ve kırk akçe ifrâz ve kabz ve istihlâk etmekle taleb ederim deyü ba‘de’d-da‘vâ ve’l-inkâr müdde‘î-i merkūm müdde‘âsını udûlden oldukları müslimînden tezkiye olunan Zindankapısı’nda bakkāl Yano v. Paroş ve Panayot v. Yorgi nâm zimmîler şehâdetleriyle isbât etmeğin mûcebiyle meblağ-ı mezkûr dört yüz kırk sekiz guruş ve kırk akçenin edâsına merkūm Yanko’ya tenbîh-i şer‘î olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 29 Ca sene 1180.