İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 378 Hüküm no: 447 Orijinal metin no: [189-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremden zarar gören Topkapı’daki çörekçi fırınının tamiri Topkapısı kurbünde Çörekçi dükkânı gediği nizâ‘ı Ma‘rûz, Topkapısı’nda hamam kurbünde Şeyhülislâm hazretlerinin nezâretlerinde olan evkāfdan merhûme Hadîce Sultân Vakfı’ndan olan ma‘lûmü’l-hudûd fırın on iki sehim i‘tibârıyla iki sehmi İsmail b. el-Hâc Mahmud’un ve beş sehmi Hadîce bt. el-Hâc Mehmed’in ve beş sehmi dahi gāibetü ani’l-meclis Âişe bt. el-Hâc Mehmed’in üzerlerinde iken zelzeleden harâb olup ta‘mîre muhtâc olmağla içinde olan gedik ta‘bîr olunur çörekçi âlâtı sâhib-i arzuhâl Mehmed iltimâsıyla sâdır olan fermân-ı âlîlerine imtisâlen müfettiş-i evkāf-ı mezkûre olan mevâlî-i izâmdan Muradzâde es-Seyyid Mehmed Said Efendi ma‘iyyetiyle dâ‘îhânede akdolunan meclis-i şer‘-i hatîrde mezbûr İsmail ve Hadîce’nin şerîkleri mezbûre Âişe diyâr-ı âharda olup ve kendülerin dahi ta‘mîre kudretleri olmamağla mütevellî-i vakf-ı mezbûr Ali malından teberru‘an mezbûrâna otuz guruş verip ve fırın-ı mezkûrun her yevm yirmi akçe icâre-i müeccelesinden zimmetlerinde müctemi‘ olan otuz guruşdan dahi zimmetlerini ibrâ etdikde onlar dahi hisselerini vakf-ı mezkûre bırakıp ve hisselerine müte‘allıka da‘vâdan gerek zimmet-i mütevellî-yi mezbûru ve gerek taraf-ı vakfı ibrâ etmeleriyle mütevellî-i mezbûr dahi mezkûr fırını ta‘mîr ve termîme mübâşeret eylediği bi’l-iltimâs huzûr-ı âlîlerine i‘lâm olundu. Fî 29 Ca sene [1]180.