İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 387 Hüküm no: 461 Orijinal metin no: [195-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malak’ın, Balat Dörtyolağzı’ndaki değirmen ve fırın hissesini ortakları Mihal’den teslim alması Balat kurbünde Dörtyolağzı nâm mahâlle ekmekçi gediği Ma‘rûz, Mahmiye-i İslambol’da Balat’da Dörtyolağzı’nda vâki‘ ma‘lûmü’l-hudûd ekmekçi fırını ve değirmeninde mevcûd gedik ta‘bîr olunur âlâtıyla yirmi altı bargir yirmi dört sehim i‘tibârı üzere sekiz sehmi kırk bin akçe sermâye ile Mihal v. İstefan ve dört sehmi yirmi bin akçe sermâye ile Kirkor v. Bedros üzerinde ve on iki sehmi dahi altmış bin sermâye ile Eğin kazâsı kurâsından Merkab nâm karya Avanis v. Çeçik üzerinde iken bundan akdem hâlik oldukda sulbiye kebîre kızları Malak ve Serophi’ye isâbet, merkūme Serophi dahi hâlike olmağla dokuz sehmi kırk beş bin akçe sermâye ile bi-tarîkı’l-münâsaha merkūme Malak’a ve dört sehmi on beş bin akçe sermâye ile sadriye kızı Meryem’a isâbet etmekle mersûme Malak hisse-i mezkûresini vâzı‘ü’l-yed olan şerîki Mihal’den taleb ve da‘vâ ve ahz u kabza ve bunların mütevakkıf olduğu umûrun küllîsine tarafından Agob v. Serkiz zimmîyi tevkîl ve yedinde olup yetmiş dört senesi Cemâziyelûlâ târîhiyle müverraha hüccet mantûkunca vekâleti sâbite olan merkūm Agob meclis-i şer‘-i hatîrde ekmekçi kethüdâ ve nizâm ustaları hâzır oldukları hâlde merkūm Mihal muvâcehesinde mersûme Malak’ın dokuz sehim hissesiyle kırk beş bin akçe sermâyesini vekâleti hasebiyle ahz u kabz edip gerek âlât-ı mezkûreden ve gerek sermâyeden merkūm Mihal yed ve zimmetinde aslâ hakkı bâkī kalmadığını ikrâr ve merkūm Mihal dahi tasdîk eylediği tescîl olunup bi’l-iltimâs huzûr-ı âlîlerine i‘lâm olundu. Fî 11 C sene [1]180.