İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 387 Hüküm no: 460 Orijinal metin no: [194-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halil’in varislerinden İbrahim’in Osman Ağa aleyhindeki alacak davasının reddedilmesi Za‘îm Osman Ağa’dan mîrâs da‘vâ edip men‘ Ma‘rûz, Zü‘amâdan arzuhâlde mezkûr Osman Ağa’nın hizmetkârı olup bundan akdem fevt olan Halil b. Mahmud b. Ahmed’in verâseti li-ebeveyn karındaşları arzuhâl eden İbrahim ile gāib ani’l-beled Feyzullah’a münhasıra olmağla mezbûr İbrahim Çarşamba günü Dîvân-ı âlîde ma‘kūd meclis-i şer‘-i hatîrde mezbûr Osman Ağa ile terâfu‘larında mezbûr Osman Ağa’nın bi-şarti’r-rücû‘ emriyle mûrisimiz mezbûr Halil kendi malından bâ-defter umûruna harc u sarf eylediği meblağdan sekiz bin altı yüz kırk dört akçe mezbûr Osman Ağa zimmetinde bâkī kalıp kable’l-ahz fevt olmağla hisse-i ma‘lûmemi taleb ederim deyü da‘vâ ol dahi cevâbında meblağ-ı mezkûru müteveffâ-yı mezbûre hayâtında tamâmen teslîm ve edâ edip hattâ yetmiş dört senesi Zilka‘desi’nin yirmi ikinci günü kendi menzilinde müdde‘î-i mezbûr İbrahim müteveffâ-yı mezbûrun vasîsi olan [195] hâzır bi’l-meclis Mehmed’den tereke-i sâiresini kabz esnâsında husûs-ı mezkûra müte‘allıka âmme-i da‘vâdan zimmetimi ibrâ ve iskāt ve meblağ-ı mezkûrdan zimmetimde müteveffâ-yı mezbûrun aslâ hakkı bâkī kalmadığını ikrâr ve işhâd dahi etmekle zimmetim berî olmuşdur deyü def‘ini udûlden İmam el-Hâc Salih Efendi b. Mustafa ve Halil b. Mehmed nâm kimesneler şehâdetleriyle isbât etmeğin mûcebiyle müdde‘î-i mezbûr İbrahim bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 Cemâziyelâhir sene 1180.