İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 389 Hüküm no: 464 Orijinal metin no: [195-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdarlı Mumcu İbrahim’in Matbah-ı amire’ye vermiş olduğu mum bedelinden dolayı Ömer Efendi aleyhindeki alacak davasında anlaşma sağlanması Matbâh-ı âmire Mumcusu taleb, 700 [guruş] sulh Ma‘rûz, Arzuhâl eden Üsküdarlı Mumcu İbrahim meclis-i şer‘-i şerîf-i enverde kasabların kurna kâtibi arzuhâlde mezkûr el-Hâc Ömer Efendi ile terâfu‘larında mezbûr Ömer Efendi’nin emriyle matbâh-ı âmire’ye kendi mumhânemden her şehr doksan beşer vakiye mum verip otuz altı aylık hesâbımızdan zimmetinde yediyüz guruş hakkım [196] bâkī kalmağla taleb ederim deyü da‘vâ, ol dahi bi-şarti’r-rücû‘ emrini ve ol mikdâr mum verdiğini ikrâr lâkin mukābelesinde kasabbaşı ağa yediyle mikdârı beynimizde ma‘lûm iç yağı vermekle hesâbımız üzere ancak üç yüz on beş guruş bâkī kalmış idi deyü ba‘de’l-münâza‘a bâ-vesâtet-i Müslimîn mezbûr İbrahim iki yüz guruş bedel-i makbûz mukābelesinde mezbûr el-Hâc Ömer Efendi ile sulh olup ziyâde beş yüz guruş ve gayra müte‘allıka âmme-i da‘vâdan gerek mezbûr Ömer Efendi’nin ve gerek kasabbaşı mûmâ-ileyhin zimmetini ibrâ-i âm ile ibrâ ve aslâ hakkı kalmadığını ikrâr etdikde ol dahi ibrâsını kabûl ve bedel-i merkūma ve gayra müte‘allıka âmme-i da‘vâdan kezâlik mezbûr İbrahim’in zimmetini ibrâ ve aslâ hakkı olmadığını ikrâr ve kat‘-ı münâza‘a eyledikleri iltimâslarıyla huzûr-ı âlîlerine i‘lâm olundu. Fî 11 C sene [1]180.