İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 390 Hüküm no: 466 Orijinal metin no: [196-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Abdullah’ın yoğurtçu esnafından Panko ve İstefan aleyhindeki yoğurtçu dükkânı ve masraf iddiasının reddedilmesi Yoğurtçu için dükkân binâ eyledim masrafımı versin deyü da‘vâ Ma‘rûz, Süleymaniye kurbünde bir bâb dükkâna mutasarrıf olan İsmail b. Abdullah meclis-i şer‘-i şerîf-i enverde Yoğurtçu tâifesinden Panko ve İstefan nâm zimmîler ile terâfu‘larında merkūmân Sofular nâm mahâlde yoğurtçu olmağla mahâll-i mezkûrda olan kârhânelerini bırakıp benim dükkânım için eğer yoğurtçu kârhânesi edersen bize icâr eyle demeleriyle ben dahi malımdan dükkânıma üç yüz guruş mikdârı akçe sarf edip ve yoğurtçu kârhânesi yapdırmamla merkūmâna müşâhereten icâr etmiş idim. Şimdi merkūmlar âhir-i şehr-i sâbıkda fesh-i akd-i icâre edip ke’l-evvel Sofularda olan kârhânelerine gitmeleriyle yine gelip benim dükkânımda icâre ile sâkin olsunlar yâhud masârıfım olan üç yüz guruşu mallarından versinler deyü eylediği da‘vâsı şer‘an mesmû‘a olmadığından mâ‘adâ merkūmların âhar arzuhâlde derkenâr olunan sûret-i fermân-ı âlîşânda Sofular’da olan kârhâneleri musarrah olup ve müdde‘î-i merkūmun dükkânı kaydı bulunmamağla mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Bâkī fermân hazret-i men-lehü’l-emrindir. Fî 12 C sene 1180.