İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 394 Hüküm no: 475 Orijinal metin no: [199-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyonlar Kâtibi Arabacı Vezirzade Ali’den ev yeri satın alan Hasan Çavuş ve sairlerinin evlerini inşa etmelerine izin verilmesi Keşif, Aksaray kurbünde Oruçgazi mahâllesinde Ma‘rûz, Aksaray kurbünde Oruçgazi mahâllesinde vâki‘ etrâf-ı erba‘ası Salih Efendi menzili ve bostan ve müteehhilîn odaları ve tarîk-i hâs ve tarîk-i âm ile mahdûd terbî‘an iki bin sekiz yüz zirâ‘ arsaya mutasarrıf olan hâcegân-ı Dîvân-ı hümâyûn’dan hâlâ Kalyonlar Kâtibi Arabacı Vezîrzâde el-Hâc Ali Efendi’den birer menzil yeri iştirâ eden ashâb-ı arzuhâl Sipah çavuşlarından Hasan Çavuş ve Dīvân-ı hümâyûn çavuşlarından es-Seyyid Mahmud Çavuş ve A‘mâ Yusuf ve es-Seyyid Mustafa ve Ömer ve Ali’nin arsa-i merkūme üzerine menâzil binâsına izin ve ruhsat istid‘âsıyla mübârek rikâb-ı kâm-yâba verdikleri arzuhâlleri bâlâsına husûs-ı mezbûru görüp kadîmî ne vechiledir, ba‘de’s-sübût iktizâsı i‘lâm olunmak bâbında dâ‘îlerine hitâben sâdır olan fermân-ı âlîye imtisâlen keşif nâibimiz es-Seyyid Halil Efendi irsâl, ol dahi Hâssa mi‘mârlarından İsmail ve Ubeydullah Halîfeler ile mahâll-i mezbûra varıp ahâlîden kadîmini suâl eylediklerinde mahâlle-i mezbûre İmamı Mehmed Efendi b. Hüseyin ve mezbûre Abdullah b. Ali ve arsa-i merkūmenin civâr ve ittisâlinde olanlardan udûlden Yakub Ağa Câmi‘i İmamı Şeyhü’l-kurâ el-Hâc Salih Efendi b. Ali ve Hâfız Abdullah Efendi b. Mahmud ve Abdülkadir Çelebi b. Abdullah ve el-Hâc Salih b. el-Hâc Hüseyin ve el-Hâc Mahmud b. Ahmed nâm kimesneler hâzirûn olup fi’l-asl arsa-i mezkûre eski Saray-ı âlîleri hocası İbrahim Efendi ve Odabaşı Tiryaki Ali Çelebi ve Saraylı Fâtıma Hatun ve Kādı Hasan Efendi ve İbrahim Çelebi ve Salbaş el-Hâc İsa nâm kimesneler menâzili ve sâir menziller olup bin yüz otuz senesi Şa‘bân-ı şerîfinde vâki‘ olan harîk-i kebîrde muhterike oldukda el-Hay Paşazâde Mustafa Bey merhûm ashâbından iştirâ ve kendüye bir menzil binâ ve altmış dokuz târîhinde ol dahi muhterik olmağla arsa-i mezkûre üzerine bir menzil binâsına kimesne rağbet etmeyip hâlî ve mu‘attal kalmış idi. Hâlâ kadîmîsi üzere müteehhilîn menâzili binâ olunduğu sûretde kimesneye zarâr-ı şer‘îsi olmadığından mâ‘adâ emniyetimize dahi bâ‘is olur deyü haber verdikleri [200] mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 15 Cemâziyelâhir sene 1180.