İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 395 Hüküm no: 476 Orijinal metin no: [200-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremden zarar gören Debbağzade Hacı Hüseyin Efendi Camii’nin tamiri için keşif yapılması Altımermer kurbünde Debbâğzâde Hacı Hüseyin Efendi Câmi‘ keşfi Ma‘rûz, Nezâret-i dâ‘îlerinde olan evkāfdan Altımermer kurbünde Seyyid Ömer mahâllesinde vâki‘ arzuhâl-i mezkûrda Debbâğzâde el-Hâc Hüseyin Efendi Câmi‘-i şerîfi zelzeleden rahnedâr olmağla sâdır olan fermân-ı âlîlerine imtisâlen mi‘mâr ağa hulefâsı ma‘rifetleriyle taraf-ı şer‘-i şerîfden keşf ü tahmîn olundukda mi‘mâr ağa kulları defteri mantûkunca masârıf-ı ta‘mîri sekiz yüz yirmi sekiz buçuk guruşa bâliğ olup ve vakf-ı mezkûrun îrâd ve masârıfı muhâsebesi rü’yet olundukda îrâdı bin yetmiş iki buçuk guruşa bâliğ ve dört yüz doksan iki guruş vezâif-i mürtezika ve masârıf-ı mu‘ayyenesine sarf olunup ve bâkī beş yüz seksen dokuz buçuk guruşun iki yüz doksan buçuk guruşu vakf-ı mezkûr musakkafâtı müstecirleri zimmetlerinde olup müte‘assirü’t-tahsîl olmağla ancak der-kîse iki yüz seksen dokuz guruş malı olup ol dahi masârıf-ı ta‘mîrine kâfî ve vâfî olmadığı ma‘lûm-ı devletleri buyruldukda emr ü fermân hazret-i men-lehü’l-emrindir. Fî 17 C sene [1]180