İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 398 Hüküm no: 480 Orijinal metin no: [202-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. İbrahim’in keresteci gediğinin yarısını Avanis v. Kirkor’a satması ve dükkânını da kiraya vermesi Ma‘rûz, Beşiktaş iskelesi kurbünde keresteci olan arzuhâlde mezkûr Ahmed b. İbrahim beynlerinde mu‘teber gediğin nısfını bundan akdem arzuhâl eden Avanis v. Kirkor zimmîye bey‘ etmekle nısf-ı şâyi‘inde dahi ikāmet murâd ve bin guruş sermâye vaz‘ıyla dükkân-ı merkūmu şehr-i âtî gurresinden otuz ay tamâmına dek dâ‘îhânede merkūm Avanis her şehr üçer bin akçeye icâr, ol dahi ba‘de’l-isticâr ve’l-kabûl mezkûr sermâyeyi müddet-i mezkûre tamâmına dek merkūm Avanis izâ‘at ederse edâsına Kireçkapısı’nda keresteci hâzır bi’l-meclis Sahak v. Markos nâm zimmî kefil ona dahi Odunkapısı’nda keresteciler Kethüdâsı Mehmed Emin ve Yiğitbaşı es-Seyyid İbrahim ve Molla Osman ve el-Hâc İsmail’den her biri kefil olmalarıyla bu vechile rızâlarıyla beynleri bulunup kat‘-ı nizâ‘ eyledikleri iltimâslarıyla huzûr-ı âlîlerine i‘lâm olundu. Fî 17 C sene [1]180.