İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 397 Hüküm no: 479 Orijinal metin no: [201-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çavuş Vakfı Mütevellisi İmam Mehmed Emin Efendi’nin dükkân satışının iptaline dair Mehmed Emin ve İbrahim aleyhindeki davasının reddedilmesi Abdi Çavuş Vakfı’ndan Uzunçarşı’da bir bâb kalpakçı dükkânı nizâ‘ı Ma‘rûz, Nezâret-i dâ‘îlerinde evkāfdan Uzunçarşı’da Samanviran mahâllesinde vâki‘ arzuhâlde mezkûr Abdi Çavuş Vakfı’nın mütevellîsi arzuhâl eden İmam Mehmed Emin Efendi meclis-i şer‘-i şerîfde vakf-ı mezkûrdan mahâll-i mezkûrda vâki‘ ma‘lûmü’l-hudûd bir bâb kalpakçı dükkânına mutasarrıfe iken fevt olan Âişe Hanım bt. Mehmed Paşa’nın oğlunun sulbî sagīr oğulları Mehmed Emin Bey ve İbrahim Bey’in vasîleri Rukıye Hanım tarafından vekîli hâlâ kasabbaşı el-Hâc Ali Ağa ile terâfu‘larında mezkûr dükkân müteveffât-ı mezbûre Âişe Hanım’ın tasarrufunda iken işbu seksen senesi Cumâdelûlâsı’nın on birinci günü tarafından vekâleti müsbet vekîli işbu meclisde Kayıkçı Hasan müvekkilesi Âişe Hanım için dükkân-ı merkūmu mezbûrân Mehmed Emin Bey ve İbrahim Bey’e ferâgat eyledi deyü bi’l-vekâle ferâgat etdikde ben bi’t-tevliye izin vermiş idim. Lâkin müvekkile-i mezbûre ol vakitde müteveffât olduğuna hâlâ ben muttali‘ olup iznim mu‘teber olmamağla dükkân-ı mezkûr mahlûl olmuşdur deyü iddi‘â ve ferâğ temessüküne nazar olundukda şehr-i mezkûr gurresi târîhiyle müverrah olmağla mütevellî-i mezbûr istintâk olundukda bana gurre tahrîr etdirdiler eğer ferâğı gurre-i merkūmede ise maraz-ı mevtinde olmuş olur eğer şehr-i mezbûrun on birinci günü ise vefâtından sonra olmuş olup ferâğ-ı mezkûr mu‘teber değildir deyü eylediği da‘vâsını tashîha kādir olmamağla mesmû‘a olmayıp ve gurre-i merkūmede mezbûre Âişe Hanım hayâtda olup maraz-ı mezbûra mübtelâ olduğu ihbâr olunduğu bi’l-iltimâs huzûr-ı âlîlerine i‘lâm olundu. Fî 16 C sene [1]180.