İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 401 Hüküm no: 486 Orijinal metin no: [203-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin menzilinin su kuyusuna yakın lağım kuyusu açan Mustafa b. Musa’dan şikâyeti Ma‘rûz, Sâdır olan fermân-ı âlîlerine imtisâlen savb-ı şer‘-i enverde keşif nâibimiz müderrisîn-i kirâmdan es-Seyyid Halil Efendi irsâl, ol dahi hâssa mi‘mârlarından Abdullah ve Ebubekir Halîfeler ile vesâir ümenâ-yı şer‘le mahmiye-i İstanbul’da Saraçhâne kurbünde Mimar Ayas mahâllesinde vâki‘ Rumeli kuzâtından sâhib-i arzuhâl el-Hâc Hüseyin Efendi b. Hasan tasarrufunda olan menzile varıp huzûr-ı Müslimînde akdeylediği meclis-i şer‘-i şerîfde mezbûr Hüseyin Efendi arzuhâlde mezkûr Mustafa b. Musa muvâcehesinde merkūm Mustafa kendi menzili ile işbu menzilime mahsûs olan tarîk-i hâs üzerine benim iznim olmaksızın menzilimde olan su kuyusuna [204] üç zirâ‘ karîb mahâlde kenîf çukuru hafr ve asma çardakı binâ ve ihdâs etmekle hâsıl olan zarârını def‘ eylesin deyü ba‘de’d-da‘vâ ve’l-mu‘âyene ve’l-ikrâr mezbûr Mustafa zikr olunan çukuru imlâ ve çardakı def‘e ta‘ahhüd ve bu vechile kat‘-ı nizâ‘ eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 19 Cemâziyelâhire sene 1180.