İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 402 Hüküm no: 488 Orijinal metin no: [204-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paşabahçe’deki mumhaneye İstanbul ve Galata kapanlarından verilen yağ hissesinin dörde çıkarılması Ma‘rûz, Evkāf-ı hümâyûn-ı hazret-i cihândârîden Paşabahçesi’nde vâki‘ mumhânenin İstanbul ve Galata kapanlarından iki hissesine iki hisse dahi zam olunmak ol havâlîde olan ibâdullaha enfa‘ olduğunu Yoros nâibi efendi dâ‘îleri fermân-ı âlîleriyle i‘lâm ve taraf-ı vakf-ı hümâyûna dahi zarârı melhûz olmayıp imârete sebeb olacağını kāimmakām-ı vakf-ı hümâyûn efendi kulları kezâlik i‘lâm etmeleriyle sâdır olan fermân-ı âlîlerine imtisâlen mumcular kethüdâsı ve sâir ustaları meclis-i şer‘e ihzâr ve istintâk olundukda fi’l-hakīka mezkûr mumhâneye iki hisse kifâyet etmeyip iki hisse dahi zam olunması muktezî olduğunu ihbâr etmeleriyle vech-i meşrûh üzere mahâlline kayd ve mezkûr mumhâne için ba‘de’l-yevm iki kapandan emsâli gibi dört hisse yağ verilmek iktizâ eylediği ber-mûceb-i fermân-ı âlî huzûr-ı âlîlerine i‘lâm olundu. Fî 18 min-Cemâziyelâhire sene 1180.