İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 402 Hüküm no: 489 Orijinal metin no: [204-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağ bedellerinde ikişer akçe indirim yapılması Bâ-sah İşbu Cemâziyelâhire’nin yirminci gününden ikişer akçe tenzî[l] ile fürûht olunmak üzere i‘lâm mûcebince atî[k]leri tevzî‘ ve mukaddem verilen nizâmın şurûtuna ri‘âyet olunmak buyruldu. Fî 11 C sene 1180. Ma‘rûz, Bu sene-i mübârekede don ve çerviş yağının Boğdan voyvodası tahrîri üzere mahâllinde bin vakiyesi yüz yetmiş beş guruşa tüccâr iştirâ etmekle her kıyyesi yirmi birer akçeye gelip tüccârın iddi‘âları üzere dört akçe masrafla yirmi beşer akçeye bâliğ ve ikişer akçe fâiz ile yirmi yedişer akçeye ibâdullaha bey‘ ve üçer akçe tenzîle tahammülü olup tansîf kabûl etmemekle ancak ikişer akçe tenzîl iktizâ etmekle [205] iki kapanda dört beş yüz yedek atik yağ mevcûd olup ve yeni yağın tenzîl-i tevzî‘ine mezâhim olmağla geçen sene don ve çerviş yağının mahâllinde her bin vakiyesi iki yüz guruşa fürûht olunmağla masârıfıyla yirmi sekizer akçeye bâliğ ve çerviş yağının dahi iki akçe fâiz ile don yağı misillü otuzar akçeye bey‘i lâzım gelmiş iken tüccâr otuz altışar akçeye bey‘ etmeleriyle her kıyyede çerviş yağından sekiz akçe fâidelerine binâen eski yağdan dahi şimdi ikişer akçe tenzîl olunması tüccâra tefhîm olundukda râzılar olmayıp lâkin mumcuların yedlerinde işleyecek yağları kalmamağla yeni yağdan iki akçe tenzîl şartıyla bu def‘a alacakları atik yağı işbu şehr-i mübârekin yirmi beşinci gününe dek si‘ar-ı sâbıkı üzere işleyip ve yevm-i mezbûrdan sonra bâkiyesini iki akçe tenzîl ile otuz dörder akçeye işleyip ve bakkāllara bey‘e râzı olmamalarıyla iki kapanda mevcûd olan atik yağlarının cümlesi mumculara tevzî‘ ve çervişlerin ancak mukābilleri verilip ve bâkiye çervişlerin mukābillerini tedârik etmedikçe mukaddemâ olan ta‘ahhüd ve evâmir-i aliyye mûceblerince çervişleri verilmemek üzere fermân-ı âlîleri sudûru bâbında emr ü fermân hazret-i men-lehü’l-emrindir. Fî 12 Cumâdelâhire sene [1]180.