İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 408 Hüküm no: 496 Orijinal metin no: [209-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yemişçi esnafından İsmail’in, Mehmed ile nöbetleşe kullandıkları yemişçi dükkânını süresi sonunda kendine teslim etmediğine dair şikâyeti Yemişçi gediği muhâyâtını îfâ Ma‘rûz, Mahmiye-i İslambol’da Balıkpazarı Kapısı kurbünde yemişçi İsmail mahmiye-i mezbûrede meclis-i şer‘-i hatîrde şerîki el-Hâc Mehmed mahzarında mahâll-i mezkûrede vâki‘ Vâlide Sultân Vakfı’ndan âhar şerîklerim ile taht-ı icâremizde olan dükkânda mevcûd gedik ta‘bîr olunur yemişçi âlâtı mezbûr el-Hâc Mehmed ile münâsafeten mülkümüz olup mezbûr el-Hâc Mehmed dükkân-ı merkūmda müstakillen sâkin ve âlât-ı mezkûreyi dahi isti‘mâl etmekle her birimiz birer sene zabt etmek üzere beynimizde muhâyât edip bu vech üzere i‘lâm dahi olmuş iken mezbûr el-Hâc Mehmed bir seneden ziyâde bir sene dahi fuzûlî zabt edip işbu yetmiş dokuz senesi Muharremi’nin yirmi beşinci günü ikişer sene zabt etmek üzere tekrâr akd-i muhâyât etmiş iken mezbûr el-Hâc Mehmed işbu târîh-i i‘lâma gelince fuzûlî dokuz ay dahi zabt etmekle müddet-i muhâyât tamâm olunca âlât-ı mezkûre bana teslîm olunmak matlûbumdur deyü da‘vâ ve mezbûr el-Hâc Mehmed cevâbında târîh-i mezkûrda ber-vech-i muharrer akd-i muhâyât etdiklerini ikrâr lâkin ba‘de’l-akd hissesini bana dörder buçuk guruşa icâr etmiş idi deyü eylediği def‘ini isbâtdan âciz ve tahlîfe dahi tâlib olmamağla müdde‘î-i mezbûr İsmail’in müddet-i muhâyâtı tamâm olunca âlât-ı mezkûreyi mezbûr İsmail’e teslîm iktizâ eylediği bi’l-iltimâs huzûr-ı âlîlerine i‘lâm olundu. Fî 18 min-Şevvâl sene 1179.