İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 408 Hüküm no: 495 Orijinal metin no: [209-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavukçular esnafının, şikâyette bulundukları kethüdaları Ali’nin kanunsuz iş yapmayacağına dair taahhütte bulunması Tavukçular Kethüdâsı gereği gibi umûruyla idâreye ta‘ahhüd Ma‘rûz, Arzuhâl eden mahmiye-i İslambol’da Tavukçu esnâfı Osman ve Hızır ile Kiro ve Niko ve Tano ve İstefan ve Haso ve Tanaş ve İstastar ve sâirleri ile taşradan tavuk getiren Apostol ve Yorgi meclis-i şer‘-i şerîfe ihzâr etdirdikleri Saray-ı hümâyûnda Zülüflü teberdârlığından bâ-berat-ı âlîşân tavukçular kethüdâsı olan derûn-ı arzuhâlde mezkûr Hâfız Ali’den mezbûr Hâfız Ali umûrumuzu idâreye tekâsül ve taşradan gelen tavukları beynimizde nizâmımız üzere tevzî‘ etmemekle tavuk getirenlerin beher tevzî‘de bir iki kafes tavuğunu kim aldığı ma‘lûm [ve] mu‘ayyen olmayıp bahalarını bize tazmîn eylediklerinden mâ‘adâ beher kafes başına birer ve ikişer tavuk alıp nizâmımızın ihtilâline bâ‘is olmağla kethüdâlıkdan ihrâc ve yerine kethüdâlık umûrunu idâreye kādir kimesne nasb olunmak matlûbumuzdur deyü teşekkî etdiklerinde ol dahi inkâr ve fî-mâ-ba‘d dahi hîn-i tevzî‘de ustaları ma‘rifetleriyle nizâm-ı kadîmleri üzere tevzî‘ ve herkesin hissesini ta‘yîn ve berren ve bahren taşradan tavuk getirenlerden hilâf-ı şer‘-i şerîf nesne mutâlebe etmeyip gereği gibi umûrlarını idâreye ta‘ahhüd etdikde onlar dahi bu minvâl üzere râzılar olup kat‘-ı nizâ‘ eyledikleri mübâşiri iltimâsıyla huzûr-ı âlîlerine i‘lâm olundu. Fî 18 min-Şevvâl sene 1179.