İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 413 Hüküm no: 502 Orijinal metin no: [211-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun Vakfı’ndan Çörekçi fırınının Hasan Usta’ya kiraya verilmesi Çörekçi fırınına Hasan nâm kimesne idhâl, Ma‘rûz, Mahmiye-i İslambol’da Koca Mustafa Paşa Câmi‘i kurbünde Çerâğī Hasan mahâllesinde vâki‘ Saliha Hatun Vakfı’ndan olan Çörekçi fırını altı sehim i‘tibârıyla dört sehmi el-Hâc Mehmed ve bir sehmi Abdullah ve bir sehmi dahi arzuhâl eden es-Seyyid Ömer üzerinde olduğu yedlerinde olan vakıf temessükü mantûkunca müte‘ayyin ve odunluk arsası dahi müstakillen mezbûr el-Hâc Mehmed’in âhar vakıfdan müstakillen üzerinde olup ve fırın-ı mezkûrun içinde gedik ta‘bîr olunur âlât-ı lâzımesi arzuhâl eden mezbûr es-Seyyid Ömer’in olup mezbûrânın aslâ alâkaları olmadığı ikrâr ve i‘tirâflarıyla zâhir oldukdan sonra mezbûr el-Hâc Mehmed meclis-i şer‘-i enverde mezbûr es-Seyyid Ömer mahzarında Çörekçiler Kethüdâsı ve ustaları hâzır oldukları hâlde mezbûr es-Seyyid Ömer için bundan akdem mahâllesi ahâlîleri iştikâsıyla fırın-ı mezkûrdan ihrâcına i‘lâm olunmağla ben dahi fî-mâ-ba‘d fırın-ı mezkûrdan hissemi mezbûr Ömer’e icâr etmem deyü ibâ ve gerek kendi ve gerek oğlu hâzır bi’l-meclis İbrahim kefil oldukları Çörekçi ustalarından Hasan nâm kimesneyi fırın-ı mezkûra iskân murâd etdikde mezbûr es-Seyyid Ömer [212] ve çörekçi ustaları râzılar olup bu minvâl üzere kat‘-ı nizâ‘ eyledikleri tescîl ve bi’l-iltimâs huzûr-ı âlîlerine i‘lâm olundu. Fî 20 min-Şevvâl sene 1179.