İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 413 Hüküm no: 503 Orijinal metin no: [212-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule debbağlarının Saraçhane’de dükkân açmalarına izin verilmesi Saraçhânede debbâğlar için ta‘yîn-i dükkân, 6 aded Ma‘rûz, Yedikule debbâğlarının Saraçhâne’de sâkin oldukları on bir aded dükkânlardan ihrâçları için mübârek rikâb-ı müstetâba arzuhâl eden Saraçhâne Kethüdâsı Halil ve ustalarından Ali ve Mehmed ve diğer Mehmed ve es-Seyyid İbrahim Çarşamba günü arz odasında huzûr-ı âlîde Debbâğlar Ahîbabası el-Hâc Ali ve kethüdâları Mehmed ve yiğitbaşıları İbrahim ve kâtibleri el-Hâc Mehmed ve el-Hâc Salih ile terâfu‘larında zikr olunan dükkânlar için tarafeynin yedlerinde olan senedâta nazar olundukda mazmûnları bir birine muhâlif olmağla li-ecli’t-taharrî da‘vâlarına faysal verilmeyip rızâlarıyla beynlerinin ıslâhına tevkīf olunmuş idi. Hâlâ huzûr-ı âlîde isimleri zabt olunanlardan mâ‘adâ Saraçhâne ustalarından el-Hâc Ali ve Süleyman Çelebi ve Hüseyin ve Ahmed ve diğer Süleyman ve Bursalı Hüseyin ve Osman Çelebi ve Molla Mehmed ve Sandıkçı ustalarından Mehmed Usta ve el-Hâc Halil ve Halil Odabaşı ve Molla Musa ve İbrahim Çelebi ve Kırbacılardan Mehmed Usta ve İbrahim ve debbâğlar ustalarından kezâlik isimleri zabt olunanlardan mâ‘adâ molla İsmail ve el-Hâc Mustafa ve el-Hâc Ahmed ve es-Seyyid Mehmed ve es-Seyyid İsmail izzetlü yeniçeri ağası kulları tarafından ta‘yîn olunan ocak yazıcılarından Vefalı İbrahim Yazıcı mübâşeretiyle dâ‘îhâneye gelip tekrâr terâfu‘larında sulha rızâ göstermeleriyle hâlâ debbâğlar yedlerinde olan on bir dükkândan Saraçhânede vâki‘ Câmi‘-i şerîfin yemîninde olan dört kemer dükkân ve yesârında dahi bir kemer dükkân ve altında dahi bir dükkân cem‘an altı dükkân debbâğlara ta‘yîn ve tahsîs ve içlerine saraçların i‘timâd edecekleri ırzlarıyla mukayyed debbâğlar ustalarından ancak birer nefer kimesne iskân, onlar dahi Saraçhâneliye lâzım olan metâ‘ı vaz‘ ve bey‘ edip kendü kârlarına meşgūl ve Saraçhâneliden bir kimesneye hilâf-ı şer‘-i şerîf itâle-i yed ve lisân etmemek üzere Saraçhâne kethüdâlarına itâ‘at eyleyip eğer içlerinden birinin hilâf-ı şer‘-i şerîf fesâdı zuhûr eder ise saraçlar kethüdâsı derhâl ahz ve zâbite teslîm ve debbâğlar ahîbabasına haber verip ahîbaba ma‘rifetiyle yerine emîn olacakları ehl-i ırz âhar kimesne iskân olunup ve eğer saraçlardan dahi debbâğlara hilâf-ı şer‘-i şerîf ta‘addî ve ta‘arruz eder olursa kezâlik Saraçlar kethüdâsı men‘ ü def‘ine takayyüd eyleyip ve tarafeyn beynlerinde mu‘teber kā‘ide ve nizâmlarına muhâl fîmâ-ba‘d hareketde bulunmamak üzere debbâğların Saraçhâne’de ancak mezkûr altı aded dükkânda bey‘ ü şirâlarına râzılar ve bu minvâl üzere beynleri tevfîk olundukda debbâğlar dahi zikr olunan altı dükkândan mâ‘adâ beş dükkândan keff-i yed ve saraçlara teslîm ve şurût-ı mezkûre beynlerinde mu‘teber olmak üzere ta‘ahhüd ve ittifâk ve kat‘-ı nizâ‘ edip, lâkin bu husûs Saraçhâneli ile debbâğlar beynlerinde müddet-i vâfireden beri mümted ve tarafeynin yedlerinde mütehâlifetü’l-mezâmîn senedât olduğundan nizâ‘dan hâlî olmamalarıyla fî-mâ-ba‘d inkıtâ‘-ı nizâ‘ları için işbu şurût-ı nizâm düstûrü’l-amel kılınmak için Başmuhâsebe’ye kayd ve tarafeynin yedlerine sûret verilmek bâbında fermân-ı âlîleri sudûru emr-i savâb ve ecr-i cezîl olduğu ma‘lûm-ı devletleri buyruldukda emr ü fermân hazret-i veliyyü’l-emrindir. Fî 24 min-Şevvâl sene 1179.