İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 440 Hüküm no: 539 Orijinal metin no: [227-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karadeniz ve Akdeniz taraflarına İstanbul’dan buğday, arpa ve sair çeşitli zahire naklinin engellenmesi Ecnâs zehâirin mürûru men‘ emridir Sah, İstanbul kādısı fazîletlü efendi Bundan akdem Âsitâne-i sa‘âdet-medârda Bahr-ı sefîd ve siyâha bilâ-fermân-ı âlîşân pirinç ve kahve ve sabun ve dakīk ve revgan-ı sâde ve sâir ecnâs zehâirin mürûru men‘-i küllî ile men‘ olunup ancak kumanyalarından ziyâde nesne sefâinde bulunur ise gerek ashâb-ı sefâin ve gerek tama‘-ı hâma teba‘iyet birle cesâret eden kimesnelerin ve bu husûsun yoklamalarına memûr olanların ahz ve te’dîbleri için sâdır olan fermân-ı âlîşâna adem-i itâ‘atlarından nâşî bu hilâlde ba‘zı kimesneler bilâ-fermân hınta ve şa‘îr ve pirinç ve kahve ve sabun ve dakīk ve sâir ecnâs zehâiri sefînelere hufyeten vaz‘ ve tahmîl ve nakline ictisâr eyledikleri ve giden sefâinin yoklamalarına memûr olanların kâr ittihâzıyla müsâmahaları istimâ‘ olunmağla fî-mâ-ba‘d Bahr-ı sefîd ve siyâha giden sefâine kumanyalarından başka bilâ-fermân-ı âlî hufyeten buğday ve arpa ve pirinç ve dakīk ve kahve ve sabun ve sâir ecnâs zehâirden nesne vaz‘ ve nakil eylememek üzere Kapan-ı dakīk nâibi efendiye ve Çardak Çorbacısına tenbîh eyleyesiz, bu husûsa cesâret eden kimesneleri tarafınıza haber ve huzûrumuza i‘lâm eyleyesiz deyü [buyruldu] Fî 3 B sene [11]79.