İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 440 Hüküm no: 540 Orijinal metin no: [227-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mehmed Ağa damadı Osman Ağa’nın vakfiyesinin Küçük Evkaf Kalemi’ne kaydolunması Vakf-ı mezbûr kaydolmamağla vakfiyesi Küçük Evkāf’a kaydoluna. Ma‘rûz, Mahmiye-i İstanbul’da sâbıkā kasabbaşı olan Kara Mehmed Ağa dâmâdı demekle ma‘rûf Osman Ağa’nın İstanbul ve Edirne ve Niğbolu ve Vidin ve Karalom’da vâki‘ evkāfının ber-mûceb-i vakfiye-i ma‘mûlün-bihâ bî-berat mütevellîsi evlâd-ı zükûr-ı vâkıf-ı mûmâ-ileyhden erşed ve ekber olan Hüseyin Ağa kırk dokuz senesinde fevt olup evlâd-ı zükûru münkariza olmağla yine ber-mûceb-i şart-ı vâkıf evlâd-ı inâsının erşed ve ekberi arzuhâl eden Fâtıma Hanım dahi bî-berat mütevellîye olup lâkin vakfiyesi aklâmında mukayyed olmamağla derkenâr olduğu vech üzere işbu sene Rebî‘ülevveli’nde Küçük Evkāf’a kaydetdirilip fi’l-hakīka mezbûre Fâtıma Hanım evlâd-ı inâs-ı vâkıf-ı mezbûrdan erşed ve ekber olup tevliyet-i mezkûre ol târîhden beri üzerinde olduğunu sikātdan mazbûtü’l-esâmi Müslimîn haber vermeleriyle tevliyet-i mezkûre dahi mahâlline kayd ve mezbûre Fâtıma yedine müceddeden berat-ı âlîşân ihsân buyrulmak ricâsına iltimâsıyla huzûr-ı âlîlerine i‘lâm olundu. Fî 29 B sene 1179.