İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 57 Hüküm no: 13 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun’un tasarrufunda bulunan Kasımpaşa’daki vakıf bahçesini ve Bahçekapı’daki aşçı dükkânını kiraya verdiği Mahrûse-i Galata’ya muzâfe Kasımpaşa kasabasında Yeldeğirmeni mahallesinde sâkine Hadîce Hatun bt. Abdullah’ın sadrî kebîr oğlu ve tarafından husûs-ı âti’l-beyânda vekîl olduğu el-Hâc Salih b. Abdullah ve Ahmed Beşe b. Hasan nâm kimesne şehâdetleriyle sâbit olan İbrahim Kapudan b. Hasan Kapudan meclis-i şer‘-i şerîf-i enverde mukaddemâ vefât eden Mehmed Tahir nâm kimesnenin sulbî kebîr oğlu işbu bâ‘isü’l-kitâb es-Seyyid Mehmed Ârif mahzarında bi’l-vekâle ikrâr ve takrîr-i kelâm edip sadr-ı esbak merhûm Çorlulu Ali Paşa Vakfı’ndan olup sâlifü’z-zikr Kasımpaşa’da zindân kurbünde vâki‘ beyne’l-ahâlî ve’l-cîrân ma‘lûmü’l-hudûd bahçe ve kapısı ittisâlinde kâin bir bâb aşçı dükkânı bi’l-icâreteyn bâ-temessük-i mütevellî vâlidem müvekkilem mezbûre Hadîce Hatun’un tasarrufunda olup ve mezbûr es-Seyyid Mehmed Ârif’in babası müteveffâ-yı mezbûr Mehmed Tahir senevî altmış beş guruş icâre ile zikrolunan bahçede müste’cir iken bundan akdem mezbûr Mehmed Tahir fevt ve akd-i icâre münfesih olmağın vâlidem müvekkilem mezbûre Hadîce Hatun bahçe-i mezkûru zabtetmek murâd eyledikde mezbûr es-Seyyid Mehmed Ârif dahi cevâbında müvekkile-i mezbûre Hadîce Hatun’a bin yüz altmış üç senesi hilâlinde zikrolunan bahçeyi babam müteveffâ-yı mezbûr Mehmed Tahir hayatında icâre-i mezkûre ile îcâr eyledikde derûnunda gars eylediği eşcâr ve sâir eşyâ erbâbı beyninde mu‘teber gedik olup kendi mâlı ve mülkü olmak üzere izin verip yedine işbu bir kıt‘a gedik temessükü i‘tâ ve gedik-bahâ nâmıyla babam mezbûr Mehmed Tahir dört yüz guruş dahi verip târih-i mezkûrdan beri yirmi sene babam mezbûr zikrolunan bahçede ber-vech-i muharrer müste’cir olup ameliyle hâsıl ve gars eylediği eşcâr ve sâir eşyâ yedinde mülkü olmağla fevt oldukda bahçe sahibesi mezbûrenin derûnunda mâlı olan eşcâr ve şükûfeden mâ‘adâ bahçe-i mezkûrun derûnunda mevcûd beyne’l-hiref gedik ta‘bîr olunur eşcâr ve eşyâ-i ma‘lûme benimle vâlidem ve hemşîrelerime mevrûs olup onlar dahi hisse-i irsiyelerini semen-i ma‘lûma bâ-hüccet-i şer‘iye bana bey‘ etmişler idi deyü müdâfa‘aya tesâddî ve vâlidem müvekkilem mezbûre Hadîce Hatun dahi husûs-ı mezkûru taleben inkâr edip bu vechile beynlerinde münâza‘ât-ı kesîre ve muhâsamât-ı ekîde cereyân etmişidi el-hâletü hâzihî beynlerine muslihûn tavassutuyla bahçe-i mezkûr derûnunda olan iki yüz otuz altı aded aşılı ecnâs-ı meyve eşcârı ve seksen aded yabanî meyve eşcârı ve dokuz ocak yasemin ve on aded sagīr servi eşcârı ve on ocak Edirne gülü ve otuz beş ocak yediveren gül ve yirmi dört aded ecnâs-ı asma eşcârı ve dokuz saksı portakal ve limon eşcârı [5a] ve elli saksı yabanî turunç eşcârını vâlidem müvekkilem mezbûre Hadîce Hatun mülkü olmak üzere yedinde ba‘de’l-ibkā eşcâr-ı mezkûreden mâ‘adâ yine derûn-ı bahçede olup yedinde mâlı olan ber-mûceb-i defter-i müfredât ecnâs-ı şükûfe eşcârı ve soğanları ile âlât-ı lâzımeyi bi-safkatin vâhidetin tarafeynden bi’l-îcâb ve kabûl bey‘-ı kat‘î ile bahçevânlar kethudâsı ve sâir ihtiyâr ustaları tahmîn eyledikleri elli dokuz guruşa mezbûr es-Seyyid Mehmed Ârif’e bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eyledikden sonra semen-i mezkûr elli dokuz guruş ile yedi aylık bahçe-i mezkûr icâresinden bi-tarîkı’s-sulh yirmi beş guruşla cem‘an seksen dört guruş mezbûr es-Seyyid Mehmed Ârif bana def‘ ü teslîm eyledikde ben dahi ber-vech-i muharrer bi’l-vekâle yedinden tamamen ba‘de’l-ahz ve’l-kabz mezbûr es-Seyyid Mehmed Ârif ber-minvâl-i muharrer iştirâ eylediği ecnâs-ı şükûfe eşcârı ve soğanları derûn-ı bahçeden ihrâc ve yerlerine iki sene tamamına değin eşcâr ve sebzevât ve sâir eşyâ gars ve zer‘ ile bahçe-i mezkûru hâlî terk etmemek üzere ta‘ahhüd eyledikde vâlidem müvekkilem mezbûre Hadîce Hatun dahi bahçe-i mezkûrda gars edip hâsıl eylediği ecnâs-ı eşcârı ve sebzevât ve sâir eşyâ-i mezbûre es-Seyyid Mehmed Ârif’in kendi mâlı ve mülkü olup gedik olmak üzere kendiye izin verip fîmâ-ba‘d müdâhale etmemek üzere ba‘de’t-ta‘ahhüd vâlidem mezbûre Hadîce Hatun bahçe-i mezkûru sene-i âtiyye Muharremi gurresinden beher sene icâre-i kadîmesi olan altmış beş guruşa ve Bahçekapısı ittisâlinde kâin mârrü’z-zikr aşçı dükkânını dahi gurre-i merkūmeden beher şehr birer mahbûb altınına mezbûr es-Seyyid Mehmed Ârif’e îcâr ve teslîm eyledikde ol dahi ber-vech-i muharrer istîcâr ve tesellüm ve kabûl eyledikden sonra vâlidem müvekkilem mezbûre Hadîce Hatun bi’l-asâle ve ben bi’l-vekâle husûs-ı mezkûra ve bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan mezbûr Mehmed Ârif’in zimmetini ol dahi kezâlik husûs-ı mezkûra ve sâire müte‘allika da‘vâdan vâlidem müvekkilem mezbûre ile benim zimmetimi ibrâ-i âmm-ı kātı‘u’n-nizâ‘la ibrâ ve ıskāt ve herbirimiz bi’l-asâle ve bi’l-vekâle âharın ibrâsını kabûl eylediğimizden sonra icâre-i mezkûrelere ve bi’l-cümle husûs-ı merkūmlara bağçevân ustalarından işbu hâzırûn bi’l-meclis İbrahim Usta b. Mehmed ve Ahmed Beşe b. Hasan ve Halil Beşe b. Mehmed ve diğer İbrahim Usta b. Mehmed nâm kimesneler ile Petro v. Mitro ve Zoko v. Yuvan ve Kosta v. Marko nâm zimmîlerden herbiri kefîl olup mezbûreden dahi Kethudâ Vekîli el-Hâc Halil b. Mehmed nâm kimesne tekeffül eyledi dedikde mezbûr es-Seyyid Mehmed Ârif dahi vekîl-i mukırr-ı merkūm İbrahim Kapudan’ı kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî 27 Zilhicce sene 1183. Şuhûdu’l-hâl: es-Seyyid İsmail Ağa b. İbrahim, el-Hâc Mustafa Kapudan b. Ramazan, Hasan Beşe b. Ali, Abdullah b. Nasuh, İbrahim b. Veli, Ahmed Emin Çelebi b. Ahmed, es-Seyyid Ali b. Hasan, İsmail b. Halil, Mustafa Beşe b. Süleyman.