İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 59 Hüküm no: 14 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baron v. Ağya’nın aldığı borç karşılığında rehin verdiği evini borcunu ödeyerek aldığı Mahmiye-i İstanbul’da Şeyhferhad mahallesinde mütemekkin iken bundan akdem hâlik olan Ariton v. Bagram nâm zimmînin verâseti zevce-i menkûha-i metrûkesi Sima bt. Kiragos nâm Nasrâniye ile kebîr oğlu Karabet nâm zimmîye ve sulbiye kebîre kızı Uskohi Nasrâniye’ye münhasıra olduğu lede’ş-şer‘ tahakkukundan sonra mezbûr Karabet zimmî asâleten ve mezbûretân Sima ve Uskohi Nasrâniyeler taraflarından vech-i âtî üzere vekîli şahıslarını ârifân Papa Kirkor v. Sekyas ve Karabet v. Ariton şehâdetleriyle sâbit olan Kirkor v. Avanis nâm zimmî meclis-i şer‘-i şerîf-i enverde işbu bâ‘isü’r-rakīm Baron v. Ağya nâm zimmî muvâcehesinde herbiri bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Tavukçuoğlu Sahak zimmî menzili ve bir tarafdan Saltana Nasrâniye menzili ve bir tarafdan Mazlum Kigork zimmî menzili ve bir tarafdan tarîk-i âm ile mahdûd sokak tarafında fevkānî bir bâb oda ve bir sofa ve bahçe tarafında fevkānî üç bâb oda ve tahtında kenîf ve bi’r-i mâ ve bir zîr-i zemîn mahzen ve bir mikdâr bahçe ve havluyu müştemil bir bâb mülk menzil mezbûr Baron zimmînin yedinde mülkü olduğu hâlde işbu bir kıt‘a hüccet-i şer‘iye nâtıka olduğu üzere mersûm Baron zimmî menzil-i mezkûru sûret-i kat‘îde hâlik-i mesfûr Ariton zimmîye hayatında yetmiş iki senesi Cumâdelûlâsı’nın dokuzuncu günü yedinden müstedâne ve makbûz bin guruş deyni mukābelesinde bey‘ ve temlîk ve teslîm ve ba‘dehû yedinden istîcâr ve tesellüm edip lâkin bey‘-ı mezkûr hakīkatde bey‘-ı kat‘î olmayıp rehin olmağla mersûm Baron zimmî mezkûr bin guruşu kable’l-edâ mûrisimiz mersûm Ariton zimmî ber-vech-i muharrer hâlik ve meblağ-ı mezbûr bize mevrûs olmuşidi el-hâletü hâzihî mersûm Baron zimmî asl-ı deyn-i mezkûr bin guruşu târih-i kitâba gelince ücret-i menzilden bâkī meblağı bize def‘ ü teslîm eyledikde biz dahi ber-minvâl-i muharrer bi’l-asâle ve bi’l-vekâle yedinden bi-kadri’l-hısas tamamen ahz u kabz edip bey‘-ı mezkûru bi’t-terâzî beynimizde fesh ü ikāle ve menzil-i mezkûru rehniyetden fekk ü tahlîs edip mersûm Baron zimmîye bi’l-asâle ve bi’l-vekâle edâ ve teslîm eyledik min-ba‘d meblağ-ı mezkûr bin guruş ile ücret-i menzilden mersûm Baron zimmetinde ve kıbelinde bir akçe ve bir habbe bâkī kalmamağla husûs-ı mezkûra müte‘allika âmme-i da‘vâdan mersûm Baron zimmînin zimmetini asâleten ve vekâleten ibrâ ve ıskāt edip ol dahi ibrâyı kabûl etmeğin fîmâ-ba‘d menzil-i mahdûd-ı mezkûr mersûm Baron zimmînin kemâ-fi’l-evvel mülk-i sahîh ve hakk-ı sarîhi olup benim ve müvekkiletân-ı mersûmetân Sima ve Uskohi Nasrâniyelerin kat‘a alâka ve medhalimiz kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Muharrem sene 1184. Şuhûdu’l-hâl: Vekîl-i Kethudâ-yı Muhzırân Mehmed Ağa b. Ahmed, Molla İsmail b. Ali, Ali Çelebi b. Veli, Azizoğlu Muhzır Mehmed, Baltacı el-Hâc Mustafa, Papa Kirkor v. Sekyas, Papa Sekyas v. Haçador, Papa Haçador v. Bogos.